विराटनगर, ५ असोज नेपाल कम्युनिष्ट पार्टी (नेकपा) का अध्यक्ष पुष्पकमल दाहाल‘प्रचण्ड’ ले मन्त्रिमण्डलको पुनःगठन हुनसक्ने संकेत गरेका छन् ।
आइतवार विराटनगर विमानस्थलमा सञ्चारकर्मीसँग कुराकानी गर्दै उनले मन्त्रिमण्डल पुनःगठन हुनसक्ने संकेत गरेका हुन् ।
प्रधानमन्त्रीले आवश्यक ठानेमा मन्त्रिहरु हेरफेर गर्न सक्ने अध्यक्ष प्रचण्डको भनाइ छ । उनले प्रधानमन्त्री केपी ओलीको स्वास्थ्य अवस्था राम्रो भएको समेत बताए ।
अध्यक्ष दाहालले अहिले परिवर्तन बिरोधीहरुले टाउको उठाउन खोजेका कारण अराजक गतिविधि र उछृङ्खल क्रियाकलाप बढेको भएता पनि वर्तमान प्रणालीमा कुनै खतरा नभएको टिप्पणी गरे । सरकारले मात्र नभई सबै राजनीतिक दल गम्भीर भएर अराजक गतिविधि र उछृङ्खल क्रियाकलापप्रति प्रतिवाद गर्नुपर्नेमा उनको जोड छ ।
उनले देशको आर्थिक वृद्धि दर ७ प्रतिशत रहेको र भ्रष्टाचारको विरुद्धमा समेत सरकार अघि बढेको भन्दै निराश हुनुपर्ने स्थिति नरहेको बताए ।
सरकारले नीति निर्माण गर्नमा धेरै समय खर्चिनुपरेकाले बिकाशको गति कम देखिएता पनि अब विकासका काममा तीव्रता दिनुपर्नेमा उनले जोड दिए । नीति निर्माण नगरी विकास निर्माण हुन् नसक्ने हुँदा पहिले नयाँ ऐन कानुन बनाउन सरकार अल्झनु परेको उनले स्वीकार गरेका थिए ।