काठमाडौं, ४ कात्तिक प्रत्येक दश वर्षमा गरिंदै आएको राष्ट्रिय जनगणना आगामी २०७८ मा हुनेछ । यसका लागि यो वर्ष सातै प्रदेशमा माघ १ देखि चैत ३० गतेसम्म नमूना जनगणना गरिने भएको छ ।
यो नमूना जनगणनामा गणक, सुपरीवेक्षक लगायतमा बेरोजगार युवालाई भर्ना गर्ने निर्णय गरिएको छ । प्रत्येक प्रदेशबाट दुई जिल्लाका दरले १४ जिल्लाका ५५ वडामा नमूना गणना सञ्चालन गरिनेछ ।
केन्द्रीय तथ्यांक विभागले आइतबार पत्रकार सम्मेलन गरी सो को जानकारी गराएको हो । सबैको सुझावअनुसार जनगणनामा बेरोजगार युवालाई भर्ना गर्ने निर्णय गरिएको विभागले बताएको छ । यसबाट पठनपाठन पनि प्रभावित नहुने र बेरोजगारले रोजगारी पनि पाउने विभागको भनाइ छ ।
यस अघि जनगणनामा शिक्षकहरुलाई खटाउदै आइएको थियो । त्यसवापत शिक्षकले अतिरिक्त पारिश्रमिक पाउने व्यवस्था थियो । विभागका जनसंख्या निर्देशक डुण्डीराज लामिछानेले गणक, सुपरीवेक्षकमा यस पटक बेरोजगार युवालाई भर्ना गरिने जानकारी गराए । जनगणनाका कार्यका लागि आव २०७६/७७ को बजेटमा रु ३६ करोड २७ लाख विनियोजन गरिएको छ ।
नमूना जनगणना र ०७८ मा हुने राष्ट्रिय जनगणनामा गरी ४३ हजार २७७ गणक र ९ हजारभन्दा बढी सुपरभाइजर नयाँ भर्ना गरिनेछ ।
तथ्यांक विभागले राष्ट्रिय जनगणना २०७८ को लोगो र नारा पनि सार्वजनिक गरेको छ । विभागले जनगणनाका लागि ‘मेरो गणना, मेरो सहभागिता’ सहितको मूल नारा र लोगो पनि सार्वजनिक गरेको हाे ।