भक्तपुर, ५ कात्तिक नेपाल शैक्षिक गणतान्त्रिक मन्चको सस्थापक अध्यक्ष रहेर शिक्षक आन्दोलन उठाउन सफल भएको जश पाएका पूर्व शिक्षक नेता गुणराज लोहनी पक्राउ परेका छन् । उनी विप्लव नेतृत्वको नेकपामा आस्था राखेका कारण पक्राउ परेका हुन् ।
जनयुद्दकालदेखि नै माओवादी राजनीतिमा शिक्षक संगठनको केन्द्रीय अध्यक्ष लगायतका जिम्मेवारी निर्वाह गर्दै आइरहेका लोहनी विप्लव नेतृत्वको नेकपा गठनपछि पार्टीको केन्द्रीय समितिको साथै आन्तरिक प्रकाशन रातो खबरको निर्देशकको भूमिकामा थिए । उनी स्वास्थ्य समस्याले ग्रसित भएपछि सोमवार पार्टीले उनलाई पदबाट मुक्त गरेको घोषणा गरेको थियो । पार्टीले पदमुक्त गरेको घोषणा गरेको भोलीपल्ट मंगलवार बिहानै उनी पक्राउ परेको पारिवारिक श्रोतले बताएको छ ।
चितवनको भरतपुरस्थित आफ्नै निवासबाट प्रहरीले उनलाई पक्राउ गरेको हो । ५-७ जनाको समूहमा आएका सादा पोसाकका प्रहरीले उनलाई बिना जानकारी पक्राउ गरी बेपत्ता पारेको सरला रेग्मीले बताइन् ।
पार्टीले स्वास्थ्य प्रतिकुल रहेकोले आराम गर्न उनलाई पदमुक्त गरेको बताए पनि प्रहरीले पक्राउ गरी लगेपछि प्रहरीको आलोचना भएको छ । लोहनी लामोसमयदेखि विरलै मानिसलाई लाग्ने माइज्थेनिया ग्राबिस रोगबाट ग्रसित छन् ।