भक्तपुर, १४ कात्तिक कपिलवस्तुमा प्रहरीको गोली लागेर एक जनाको मृत्यु भएको छ । कपिलवस्तुको कृष्णनगरमा प्रहरीको गोली लागि सुरज कुमार पाण्डेको ज्यान गएको हो ।
लक्ष्मीको मूर्ति बिसर्जन गर्ने विषयमा दुई पक्षबीच झडप भएको थियो । हिजो राति लक्ष्मी मूर्ति सेलाउने विषयमा विवाद बढेपछि स्थानीय प्रशासनले हस्तक्षेप गरेको थियो । स्थिति नियन्त्रणमा लिन स्थानीय प्रशासनले चार किल्ला तोकी आज बिहान ११ बजेदेखि लागू हुने गरी अनिश्चितकालीन कर्फ्यूको आदेश जारी गरेको थियो ।
कर्फ्यू तोडेका कारण पाण्डेको ज्यान गएको प्रहरीको भनाइ रहेको छ । गोली लागेर ज्यान गुमाएका व्यक्ति भारतीय नागरीक भएको कपिलवस्तुका प्रमुख जिल्ला अधिकारी गजेन्द्रबहादुर श्रेष्ठले जनाएका छन् । कृष्णनगरकाे स्थितिलाई थप उत्तेजित पार्न ठूलो समूहमा भारतीय नागरीक नेपाल पसेका समेत प्रहरीको दाबी छ।
धार्मिक हिंसा भड्किने खतरा भएको भन्दै कपिलबस्तुका सीडीओ गजेन्द्रबहादुर श्रेष्ठको आदेशमा कृष्णनगरमा अनिश्चितकालिन कर्फ्यु जारी छ । कर्फ्यू कृष्णनगर बजारको भन्सार कार्यालयको उत्तर ७०० मिटरदेखि, पश्चिम ७०० मिटर र पूर्व ३०० मिटर क्षेत्रमा लागू गरिएको छ।