भक्तपुर, १४ कात्तिकप्रधानमन्त्री केपी शर्मा ओली स्वास्थ्य लाभ पछि अस्पतालबाट डिस्चार्ज भएका छन् । बिहीवार बेलुकी ८ बजे उनलाई ग्राण्डी अस्पतालले डिस्चार्ज गरिदिएको हो ।
प्रधानमन्त्रीको सचिवालयका अनुसार उनी डिस्चार्ज भएपछि बालुवाटारस्थित निवासमा आराम गरिरहेका छन् ।
अस अघि ग्राण्डी अस्पतालका मेडिकल डाइरेक्टर चक्रराज पाण्डेले बिहीबार पत्रकार सम्मेलन गरी प्रधानमन्त्रीको उपचारको क्रममा हेमोडायलासिस गरिएको र स्वास्थ्य अवस्था सामान्य रहेकाले डिस्चार्ज गर्ने निर्णय गरिएको जानकारी दिएका थिए ।
उनलाई भेट्न पार्टी अध्यक्ष प्रचण्ड, प्रवक्ता नारायणकाजी श्रेष्ठ, उपप्रधान तथा रक्षामन्त्री ईश्वर पोखरेल लगायतका नेताहरु अस्पताल पुगेका थिए । स्वास्थ्यमा समस्या देखा परेपछि उनी बुधबार बिहान ग्राण्डी अस्पताल भर्ना भएका थिए ।
बिहीवार डिस्चार्ज भएका प्रधानमन्त्रीले अस्पतालमा आफ्नो उपचारमा लागेका डाक्टर र नर्सहरुलाई धन्यबाद दिएका थिए । उनी ‘आई एम फिट’ भन्दै अस्पतालबाट बालुवाटारतर्फ बाहिरिएका बताइएकाे छ ।
