पछिल्लो समय नेपाल तरुणदलका नेपालगन्ज नगर सभापति संदिपजंग शाह प्रकाउ परेको घटनालाई लिएर  बाँके कोहलपुरका डीएसपी हेम बहादुर शाही चर्चाको बिषय बनेका छन् । उनलाई नेपाली काँग्रेसले कारबाहीको दायरामा ल्याउन माग गरेको छ ।

डीएसपी हेमबहादुर शाहीले संदिपसहित ६ जनालाई हतियार सहित नियन्त्रणमा लिएपछि काँग्रेस रुष्ट बनेको हो । डीएसपी शाहीले संदिपलाई फसाउन खोजेको काँग्रेसको ठहर छ । डीएसपी शाही प्रहरी आचरण विपरितका गतिविधीमा संलग्न भएको अडियो भिडियो समेत सार्वजनिक भएपछि उनीमाथि कडा कारवाहीको माग गरिएको छ । अडियोमा उनले दशैमा प्रहरीलाई खसी मागेको र आफू बिरुद्ध लागेको भन्दै धम्काएको कुरा समेत सार्वजनिक भएको छ ।

डीएसपी शाहीले भने अपराधमाथी राजनीति हुनु निकै नै दुखद बिषय भएको बताएका छन् । डीएसपी शाहीले आफ्नो इमान्दारीतामाथि औला उठाउनु अघि कार्यकर्ताको आचरण बुझ्न अनुरोध समेत गरेका छन् । अपराधको पक्षपोषण गर्नु राजनीतिको दुरुपयोग भएको भन्दै उनले आफू गलत सावित भए कारवाही भोग्न तयार रहेको बताए ।

”हामीबाट काम कारबाही गर्दा कतै कमीकमजोरी भएको छ भने हामी त्यसको फल भोग्न तयार छौँ । तर अपराधमाथि राजनीतिकरण कहिँकतै पनि हुनु हुदैन ।” स्थानीय संचारकर्मीसंग उनले भने ।

डीएसपी शाहीले देशको लागि इमान्दारीपूर्वक पेशाप्रति बफादार भएर काम गर्दा राजनीतिक रंग दल्नु दुखद बिषय भएकाे जिकिर गरे । यसले इमान्दार प्रहरीमाथि मानसिक हमलाको प्रयास भएको उनको भनाइ छ ।

‘छानबिन समिति बनेको भन्ने सुनेको छु, छानबिन समितिले छानबिन गरोस् ताकी राजनीति हावी नहोस् ।’ उनले भने ।