भक्तपुर, १८ कात्तिकअपडेट : सातवटै प्रदेशका नवनियुक्त प्रदेश प्रमुखहरुले पद तथा गोपनीयताको शपथग्रहण गरेका छन् ।
मंगलबार बिहान राष्ट्रपति विद्यादेवी भण्डारीले एक विशेष समारोहकाबीच सातै प्रदेश प्रमुखहरूलाई शीतलनिवासमा शपथ ग्रहण गराइन् । उक्त अवसरमा उपराष्ट्रपति नन्दबहादुर पुन, प्रधानमन्त्री केपी शर्मा ओली, प्रधानन्यायाधीश चोलेन्द्रशमशेर जवरालगायत उपस्थित रहेका थिए ।
सोमबारको मन्त्रिपरिषद् बैठकले गरेको सिफारिसको आधारमा राष्ट्रपति भण्डारीले सोमबार नै सातै प्रदेशका लागि नयाँ प्रदेश प्रमुख नियुक्त गरेकी हुन्।
राष्ट्रपति कार्यालयका प्रवक्ता हरिप्रसाद दाहालले जनाए अनुसार प्रदेश नम्बर १ मा सोमनाथ अधिकारी प्यासी, प्रदेश नम्बर २ मा तिलक परियार, प्रदेश नम्बर ३ मा विष्णुप्रसाद प्रसाईँ, गण्डकी प्रदेशमा अमिक शेरचन, प्रदेश नम्बर ५ मा धर्मनाथ यादव, कर्णाली प्रदेशमा गोविन्दप्रसाद कलौनी र सुदूरपश्चिम प्रदेशमा सर्मिलाकुमारी पन्त नियुक्त भएका छन् ।
शेरबहादुर देउवा नेतृत्वको तत्कालिन सरकारको सिफारिसमा राष्ट्रपतिले यस अघि नियुक्त गरेका प्रदेश प्रमुखहरुलाई गएको आइतबार पदमुक्त गरिएपछि नयाँ नियुक्ति दिइएको हो ।