भक्तपुर, २२ कात्तिककर्णाली प्रदेशको पर्यटन प्रवर्द्धन र भ्रमण वर्ष २०२० लाई सफल बनाउन मनघरी फाउन्डेसन र नासा बुलेट क्लबको संयुक्त आयोजनामा काठमाडौंको पशुपतिदेखि शे–फोक्सुण्डोसम्म मोटरसाइकल यात्रा नेपालको सबैभन्दा गहिरो ताल फोक्सुण्डो पुगेको छ ।
पहिलो पटक काठमाडौं पशुपतिदेखि शे–फोक्सुण्डोतालसम्म बुलेट मोटरसाइकल यात्रा भएको हो । कर्णाली प्रदेशको जाजरकोट,रुकुम पश्चिम, सल्यान र डोल्पा जिल्लाको पर्यटकीय सम्भावना भएर पनि पर्यटन प्रवर्द्धन हुन नसको भन्दै पर्यटन प्रर्वद्धन गर्ने हेतुले मोटरसाईकल यात्रा गरेको आयोजक मनघरी फाउण्डेशनका अध्यक्ष भरतबन्धु थापाले बताए ।
‘जबसम्म केन्द्रीय राजधानीदेखि कर्णाली प्रदेशका पर्यटकीय स्थलहरुलाई जोड्न सकिदैन, तबसम्म कर्णालीको पर्यटन प्रर्वद्धन हुँदैन’ भन्ने ठानेर आफूहरुले मोटरसाइकल बाटै कर्णालीको मनोरम रोमाञ्चक यात्रा सम्भव भएको संदेश दिन खोजेको थापाको भनाइ छ ।
टोली चार दिन लगाएर डोल्पाको दुनै पुगेको थियो । पहिलो दिन काठमाडौंदेखि दाड, दोस्रो दिन जाजरकोट तेस्रो दिन डोल्पाका त्रिपुरकोट र चौथो दिन दुनै बजार पुगेको थियो ।
जाजरकोटदेखि डोल्पाको दुनैसम्मको सडक अफरोड रहेको छ । बाटोमा पुलहरु नहुदा केही असहज भएको नासा बुलेट क्लबका अध्यक्ष प्रकाश लिम्बुले बताए । भर्खरै मात्र राष्ट्रिय सडक सञ्जालमा जोडिएको डोल्पा जिल्लामा रहेको नेपालकै गहिरो ताल शे–फोक्सन्डो, विश्वकै उच्च मानव बस्ती धो–ताक्सी, २०५२ सालमा नेपालको हो भनेर पत्ता लागेको छार्का भोटको कु–गाउँ, नेपालकै एक मात्र शहरतारामा बोलिने काईके भाषा लगायतका धेरै प्राकृतिक सौन्दर्य भएर पनि उचित प्रचार प्रसार हुन सकेको छैन ।
यस मोटरसाइकल यात्राले केही भए पनि प्रचार प्रसारमा सहयोग पुग्ने नेपाल बुद्धिजीवी परिषद, डोल्पाका अध्यक्ष आड बहादुर लामा बताउँछन् ।
