नेपाली भूमि लिम्पियाधुरा भारतले आफ्नो सीमाभित्र राखी नक्शा बनाएको विरोधमाा नेपाल मजदुर किसान पार्टीले शुक्रबार नेपालगञ्जमा विरोध प्रदर्शनको आयोजना गरेको छ ।

भारतीय विस्तारवाद मुर्दावाद, सीमा अतिक्रमण बन्द गर, लिम्पियाधुरा हाम्रै हो लगायतका विभिन्न नारा लगाई धम्वोजीचोकबाट पुष्पलाल चोकसम्म जुलुस प्रदर्शन गरिएको थियो ।

पुष्पलाल चोकमा आयोजित कोणसभा कार्यक्रममा बोल्दै नेमकिपाका केन्द्रीय सदस्य सरोजराज गोसाईले नेपालको अस्तित्वमाथि धावा बोल्ने जस्तोसुकै शक्तिविरुद्ध लड्न नेपाली जनता तयार भएको विचार व्यक्त गरे । उनले विभिन्न तथ्य तथा प्रमाणहरू हुँदाहुँदै पनि कालापानीबाट भारतीय सेना हटाउन नेपाली कांग्रेस, एमाले, नेकपालगायत कुनै पनि नेतृत्वको सरकारले ठोस कदम चाल्न नसकेको उल्लेख गर्दै देशभक्त जनता एकजूट हुनुपर्नेमा जोड दिए । भारतले नवलपरासीको सुस्तामाथि अतिक्रमण गर्दा नेमकिपाले सशक्त विरोध गरेको र पञ्चायती शासकहरूको दमनको प्रतिवाद गरेको इतिहास स्मरण गर्दै नेता गोसाईले नेपाली भूमि फिर्ता गर्न अब संघर्षभन्दा अन्य विकल्प नभएको बताएका थिए ।

कोणसभामा बोल्दै नेमकिपा, बाकेका अध्यक्ष बखतबहादुर थापा,नेपाल क्रान्तिकारी विद्यार्थी संघका केन्द्रीय सदस्य सर्जु फसिकव लगायतले सम्मूर्ण देशभक्त नेपाली एकतावद्ध भएर भारतीय बिस्तारबाद बिरुद्ध लड्नुपर्ने आवस्यकता औल्याएका थिए ।