भक्तपुर , २८ कात्तिक नेपाल मजदुर किसान पार्टीका केन्द्रीय सदस्य एवं प्रदेश नं. ३ का सांसद सुरेन्द्रराज गोसाईंले उपनिर्वाचनका लागि नेकपा र काँग्रेसका उम्मेदवारहरु योग्य नभएको बताएका छन् ।
उपनिर्वाचनको तयारी स्वरुप पार्टीले गरेको एक कार्यक्रममा उनले उपनिर्वाचनका लागि टिकट पाएका नेकपा र नेपाली काँग्रेसका दुवै उम्मेदवार योग्य नभएको जिकिर गर्दै नेमकिपाका उम्मेदवार निरज लवजूको जीत हुने दावी गरे ।
नेकपा र नेपाली काँग्रेस लगायतका दलहरु अयोग्य सावित भैसकेकाले उनका उम्मेदवार स्वत: अयोग्य भएका उनको भनाइ छ ।
सांसद गोसाईंले संघीय सरकारमा जस्तै प्रदेश नं. ३ मा पनि नेकपाबाटै सरकार रहेपनि अझैसम्म प्रदेशको राजधानी र नाम समेत टुंगो लाग्न नसकेको भन्दै आलोचना गरे ।
”नेकपाका सांसदहरु निकम्मा र नेपाली काँग्रेसक सांसद लाचार सावित भइसकेका छन् । त्यसैले, नेमकिपाका उम्मेदवार निरज लवजूलाई प्रदेश सभामा पठाउनुपर्छ ।” उनले भने ।
उक्त अवसरमा नेमकिपाका उम्मेदवार निरज लवजूले अरु दलका उम्मेदवारले जिते व्यक्ति जित्ने तर आफूले जिते जनता जित्ने जिकिर गरेका थिए । आफ्नो पार्टी सधै जनताको पक्षमा काम गरिरहेको भन्दै लवजूले आफू जनताको सेवक हुन उम्मेद्वारी दिएको दावी गरे ।
कार्यक्रममा नेमकिपाका नेता रवीन्द्र ज्याख्व लगायतले जनताले सचेत भएर मतदान गर्न जरुरी रहेको बताएका थिए ।