भक्तपुर, २९ कात्तिक पूर्व सभामुख कृष्ण बहादुर महराको दुर्व्यवहार सम्बन्धी समाचार सार्वजनिक गरेर चर्चामा आएका पत्रकार अजयबाबु शिवाकोटी ‘ईन्जा साहसी पत्रकारिता पुरस्कार’ बाट सम्मानित भएका छन् । नेपाली पत्रकारको अन्तराष्ट्रिय संजाल (ईन्जा)ले उनलाई उक्त पुरस्कार दिएको हो ।
राजधानीमा शुक्रवार एक बिशेष कार्यक्रमका बीच शिवाकोटी सम्मानित भएका थिए । उनलाई १ हजार डलर सहित प्रशंसा पत्र प्रदान गरिएको थियो । पत्रकार शिवाकोटी हाम्राकुरा डटकमका प्रधानसम्पादक तथा नेपाल प्रेस युनियनका महासचिव समेत हुन् ।
जीवनमा पहिलो पटक पुरस्कृत भएको भन्दै शिवाकोटीले खुशी व्यक्त गर्नुका साथै बिहिवार सिभिल अस्पतालमा ज्यान गुमाएका पत्रकार डिलप्रसाद शर्माको परिवारलाई आफूले पाएको पुरस्कारबाट २५ हजार सहयोग गर्ने घोषणा समेत गरे ।
मानवअधिकारवादी नेता कृष्ण पहाडीको प्रमुख आतिथ्यतामा सम्पन्न सो कार्यक्रममा पत्रकार महासंघका पूर्व अध्यक्ष तथा इन्जाका सल्लाहकार तारानाथ दाहाल,लेखनकुञ्जका अध्यक्ष कमल ढकाल र कार्यक्रमका सभापति पत्रकार टंक पन्त लगायतले आफ्नो मन्तब्य राखेका थिए ।