भक्तपुर, ५ मङ्सिर मंसिर १४ गते भक्तपुरमा हुने उपनिर्वाचनका उम्मेदवारहरुले विकासे नारा दिए सचेत बन्न साझा पार्टीका उम्मेदवार सुरज प्रधानले अनुरोध गरेका छन् । प्रदेश सभा सदस्यका लागि हुने उक्त उपनिर्वाचनमा विकासे नारा उपयुक्त नभएको उनको भनाइ छ ।
विहीवार भक्तपुरमा प्रेस मिट सेन्टर द्वारा आयोजित उम्मेदवार साक्षात्कार कार्यक्रममा साझा पार्टीका प्रधानले प्रदेश सभामा निर्वाचित सांसदहरुले ऐन कानुन बनाउने काम गर्ने भएकाले उनीहरुले दिने विकासे नारा झुटा भएको भनेका हुन् ।
प्रधानले प्रदेश सभामा निर्वाचित सांसदहरुको काम विकास गर्ने नभएको बताए । उनीहरुको काम ऐन कानुन बनाउने रहेकोले
उनीहरुले दिने विकासे नारामा नफस्न उनले सचेत गराए । यही कारण आफनो पार्टीबाट प्रदेश सभामा निर्वाचित ३ तीनजना साँंसदहरुले
निर्वाचन क्षेत्र विकास कोषको रकमलाई नलिएको उनको जिकिर छ । सरकारले प्रति प्रदेश साँंसद तीन करोड रुपैयाँं दिनेगरेको छ ।
कार्यक्रममा राष्टिय प्रजातन्त्र पार्टीबाट उम्मेदबार श्याम नेपालले ठूला पार्टी भनाउँंदाहरुले चरम भ्रष्टाचार गरेको आरोप लगाए । उनले त्यसको अन्त्यको लागि आफनो उम्मेदबारी भएको भनेका थिए । उम्मेदवार नेपालले राजसंस्था पुन:स्थापना र देशको सिमा रक्षा आफनो मूख्य निर्वाचन एजेन्डा रहेको बताए । ठूला दलहरुको आश्वासनमा नअल्झन समेत मतदातालाई उनले आग्रह गरे ।
कार्यक्रम प्रेस मिट सेन्टरका अध्यक्ष केशव लुइँटेलको अध्यक्षतामा संचालन गरिएको थियो । उक्त सेन्टरको विहीवार प्रेस काउन्सिलका अधिकृत झपेन्द्र ढकालले औपचारिक उद्घाटन समेत गरेका थिए ।