भक्तपुर,२६ मङ्सिरपश्चिमी वायुको प्रणालीका कारण चिसो बढ्नुका साथै उच्च पहाडी र हिमाली भूभागमा भारी हिमपात भइरहेको छ । जाजरकोट, हुम्लालगायतका जिल्लामा भारी हिमपात भएको मौसम पूर्वानुमान महाशाखाले जनाएको छ ।
पश्चिमी भूभागबाट नेपालमा प्रवेश गरेको न्युनचापीय प्रणालीका कारण मुलुकभर चिसो बढेको हो । न्युनतम तापक्रम धेरै तल नझरे पनि अधिकतम तापक्रम निकै तल झरेको मौसमविद्हरुले बताए ।
हिउँसंगै बढेको चिसोले जनजिवन कस्टकर बनेको छ । पूर्वी इरान र अफगानिस्तान हुँदै नेपाल प्रवेश गरेको यस प्रणालीले देशैभरको मौसममा प्रभाव पारेको हो ।
वरिष्ठ मौसमविद् शान्ति कँडेलका अनुसार शनिबारसम्म मौसममा बदली भइरहन्छ । ‘रातिदेखि नै बदली भएको हो,” उनले भनिन्, “त्यसको असर पश्चिम नेपालमा देखिएको छ । जाजरकोट र हुम्लामा भारी हिमपात भएको छ । अन्य जिल्लामा यसको असर देखिएको छ । भोलि यसको असर झनै देखिन्छ । भोलिसम्ममा अन्य जिल्लाहरुमा पनि प्रभाव पर्ने देखिन्छ ।’
उनले शनिबार पूणरुपमा सुधार नभए पनि सुधार हुँदै जाने जानकारी दिए ।