२० पुस काठमाडौं । माघ ९ गते हुने राष्ट्रियसभाका १८ सदस्यको निर्वाचनका लागि ४५ जनाले उम्मेदवारी दिएका छन् । सात प्रदेशमा तोकिएको निर्वाचन कार्यालयमा गई उम्मेदवारहरुले मनोनयन दर्ता गराएका छन् । निर्वाचन आयोगका अनुसार राष्ट्रियसभा निर्वाचनमा ६ दलले उम्मेदवारी दिएका छन् । सत्तारुढ नेकपा, प्रमुख प्रतिपक्षी नेपाली कांग्रेस, राष्ट्रिय जनता पार्टी, समाजवादी पार्टी, राष्ट्रिय जनमोर्चा र नेपाल मजदुर किसान पार्टीका उम्मेदवारहरु छन् ।
माघ ९ गते प्रदेश–१ बाट ३, प्रदेश–२ बाट ४, प्रदेश–३ बाट २, गण्डकी प्रदेशबाट २, प्रदेश–५ बाट ३, कर्णाली प्रदेशबाट २ र सुदूरपश्चिम प्रदेशबाट २ सदस्य गरी १८ सदस्यका लागि निर्वाचन हुँदैछ।
नेमकिपाले प्रदेश ३ मा र राजमोले गण्डकी र प्रदेश ५ मा उम्मेदवारी दिएको छ । प्रदेश २ मा नेकपा र राजपा तथा कांग्रेस र समाजवादी पार्टीबीच तालमेल भएको छ भने अन्य ठाउँमा सबै दल एक्लाएक्लै प्रतिस्पर्धामा छन् । सातवटा प्रदेशमा गरी महिला ७, दलित २, अपांगता भएका व्यक्ति वा अल्पसंख्यक समूहका २ र अन्य समूहका ७ गरी १८ पदका लागि निर्वाचन हुँदैछ ।
त्यसमध्ये महिला समूहतर्फ १६, दलित समूहतर्फ.५, अपाङ्गता भएको व्यक्ति वा अल्पसंख्यक समूहतर्फ ५ र अन्य समूहतर्फ १९ गरी कुल ४५ जनाले मनोनयनपत्र दर्ता गराएका आयोगका प्रवक्ता राजकुमार श्रेष्ठले भक्तपुर पोष्टलाई बताए । राष्ट्रियसभा निर्वाचनमा प्रदेशसभा सदस्य र स्थानीय तहका प्रमुख र उपप्रमुखले मतदान गर्नेछन् ।
प्रदेश–१
दलित समूहबाट १, महिला समूहबाट १ र अन्य समूहबाट १ गरी ३ सदस्यका लागि निर्वाचन हुँदैछ।दलित समूहमा कांग्रेसका निरबहादुर विश्वकर्मा, नेकपाका गोपी बहादुर सार्की आछामी र समाजवादी पार्टीका ज्ञान कुमार परियारले उम्मेदवारी दर्ता गरेका छन्।महिला समूहमा कांग्रेसका मिना पुलामी मगर, नेकपाका इन्दिरा देवी गौतम, र समाजवादी पार्टीका कमला वडहीबीच प्रतिस्पर्धा हुनेछ।अन्य समूहमा कांग्रेसका राजेन्द्र घिमिरे, नेकपाका देवेन्द्र दाहाल र समाजवादी पार्टीका भरतराज दाहालले उम्मेदवारी दर्ता गरेको निर्वाचन आयोगले जनाएको छ।
प्रदेश–२
महिला समूहबाट १, अल्पसंख्यक समूहबाट १, दलित १ र अल्पसंख्यक १ गरी ४ सदस्यका लागि निर्वाचन हुँदैछ।महिला समूहतर्फ नेकपाका तुलसा कुमारी दाहाल र कांग्रेसका नगिना यादवबीच प्रतिस्पर्धा हुनेछ।दलित समूहतर्फ नेकपाका राधेश्याम पासवान र समाजवादी पार्टीका रामपृत पासवानबीच, अपाङ्गता भएको व्यक्ति वा अल्पसंख्यक समूहतर्फ राजपाका शेखरकुमार सिंह र कांग्रेसका भोला पञ्जियारबीच तथा अन्य समूहतर्फ राजपाका मृगेन्द्र कुमार सिंह यादव र समाजवादी पार्टीका अनिरुद्धकुमार सिंहबीच प्रतिपर्धा हुनेछ।
प्रदेश–३
महिला समूहबाट १ र अन्य समूहबाट १ गरी २ सदस्यका लागि निर्वाचन हुँदैछ।महिला समूहतर्फ नेकपाकी गंगाकुमारी वेल्वासे, कांग्रेसकी छलीकुमारी शर्मा उपाध्याय र नेपाल मजदुर किसान पार्टीकी गीता काफ्लेबीच, अन्य समूहतर्फ नेकपाका वेदुराम भुसाल, कांग्रेसका हरिशरण श्रेष्ठ र नेपाल मजदुर किसान पार्टीका कृष्णबहादुर तामाङ्गबीच प्रतिपर्धा हुने आयोगले जारी गरेको विज्ञप्तिमा उल्लेख छ।
गण्डकी प्रदेश
महिला समूहबाट १ र अन्य समूहबाट १ गरी २ सदस्यका लागि निर्वाचन हुँदैछ।महिला समूहतर्फ नेकपाकी भगवती न्यौपाने र कांग्रेसकी विमला गौचनबीच, अन्य समूहतफ नेकपा नारायणकाजी श्रेष्ठ, राष्ट्रिय जनमोर्चाका शंकर प्रसाद बराल र कांग्रेसका सूर्यप्रसाद रेग्मीबीच प्रतिस्पर्धा हुने भएको छ।
प्रदेश– ५
महिला समूह १, अपांग तथा अल्पसंख्यक समूह १ र अन्य समूह १ गरी ३ सदस्यका लागि निर्वाचन हुँदैछ।महिला समूहमा नेकपाकी विमला घिमिरे, कांग्रेसकी गिरिजादेवी न्यौपानेबीच प्रतिस्पर्धा हुने भएको छ।अन्य समूहमा नेकपाका गोपाल भट्टराई, कांग्रेसका बालकृष्ण पाण्डे, समाजवादी पार्टीका कृष्णप्रसाद अहिर र राष्ट्रिय जनमोर्चाका शिवप्रसाद पौडेलबीच प्रतिस्पर्धा हुने निश्चित भएको छ।आपांग तथा अल्पसंख्यक समूहमा नेकपाका जगप्रसाद शर्मा, कांग्रेसका मेराज अहमद् हलवाई र समाजवादी पार्टीका सुनिलकुमार सिंघलबीच भिडन्त हुने निश्चित भएको छ।
कर्णाली प्रदेश
अन्य समूहबाट १ र महिला समूहबाट १ गरी दुई सदस्यका लागि निर्वाचन हुँदैछ।महिला समूहतर्फ कांग्रेसका गणेशकुमारी बस्नेत र नेकपाका सुमित्रा बिसीबीच अन्य समूहतर्फ कांग्रेसका डिल्लीराम पाठक र नेकपाका मायाप्रसाद शर्माले उम्मेदवारी दर्ता गराएका छन्।
सुदूरपश्चिम प्रदेश
महिला समूहको १ र अन्य समूहको १ गरी दुई सदस्यका लागि निर्वाचन हुॅदैछ।महिला समूहतर्फ कांग्रेसका तुलसी देवकोटा र नेकपाका शारदा देवी भट्ट, अन्य समूहतर्फ नेकपाका तारामान स्वांर र कांग्रेसका प्रतापसिंह ठगुन्नाबीच प्रतिस्पर्धा हुने निश्चित भएको हो।