भक्तपुर, २१ पुस प्रतिनिधिसभाका सभामुख छनोटमा नेकपामा रस्साकस्सी चलिरहेका बेला पार्टी अध्यक्ष पुष्पकमल दाहाल ‘प्रचण्ड’ भने सोमबार सुटुक्क सिन्धुपाल्चोक पुगेका छन् ।
पार्टीका केही नेता, सीमित सचिवालयका सहयोगी लिएर पत्नी सीता दाहाल सहित उनी चौतारा साँगाचोकगढी नगरपालिका—९ कदमवासका एक कार्यकर्ता बलराम गिरीको घरमा बास बसेका छन् ।
आराम र मुड फ्रेसका लागि भन्दै उनी सिन्धुपाल्चोक पुगेका उनका सहयोगीले भक्तपुरपोष्टलाई बताए ।
पेचिलो राजनीतिक अवस्थाकाबीच प्रचण्ड शान्त वातावरण खोज्दै बारम्बार सिन्धुपाल्चोक आइरहन्छन्। उनी यसअघि सुकुटेस्थित विच रिसोर्टमा बस्थे। यस पटक भने प्रचण्ड कार्यकर्ताको घरमा बास बस्न पुगेका हुन्।
शान्ति प्रक्रियापछिदेखि नै सुकुटेसँग अध्यक्ष प्रचण्डको साइनो गाँसिएको हो। यो पटक आरामकै लागि आएकाले नेता, कार्यकर्ता भेटघाट लगायत अन्य कुनै औपचारिक कार्यक्रम नरहेको जिल्ला पार्टी स्रोतले जनाएको छ।