भक्तपुर, २२ पुस हिमपात र माईनस डिग्रीको तापक्रमका वावजुद पनि उत्तरी हुम्लाका समुदायले विद्यालय भवनको निर्माण कार्य सम्पन्न गरेका छन् । निर्धारित समयमा काम सम्पन्न गर्नुपर्ने भएपछि समुदायले चिसोको पर्वाह नगरी दुईकोठे विद्यालय भवनको निर्माण कार्य सम्पन्न गरेका हुन् ।
सिमकोट गाउँपालिका वडा नम्बर ३ को बरगाउँमा रहेको रलिङ माविका लागि दुई कोठे भवनको निर्माण कार्यको जिम्मा समुदायलाई लगाएको थियो ।
समुदायले हिमपात भइरहेकै अवस्थामा पनि कामलाई निरन्तरता दिँदा भवनको निर्माण कार्य सम्पन्न भएको स्थानीय फुन्जोक लामाले बताए । हुम्लामा विकासे कामहरु हिउँद हिमपातको कारण भन्दै रोकिने गर्दै आएका छन् ।
तीन महिना अगाडि निर्माणको जिम्मा समुदायले पाएकोमा कामको सिजन सकिए पछि निर्र्माण कार्य सुरु गरिएको थियो । भवन निर्माण उपभोक्ता समितिले थोरै समयमा विद्यालय भवनको निर्माण कार्य सम्पन्न गरेको उनले बताए ।
भूकम्प प्रतिरोधी भवन निर्माणका लागि कुल लागत ३४ लाख ७३ हजार ५९८ रुपियाँ लागेकोमा २१ लाख ६३ हजार ५९८ रुपियाँ गुड नेवर्स इन्टरनेशनल नेपाल ( जिएनआई ) को लगानी रहेको छ भने ११ लाख १५ हजार एलजियु र एक लाख ९५ हजार स्थानीय समुदायको जनश्रमदान रहेको जिएनआई जिल्ला संयोजक बिरेन्द्र चौधरीले जानकारी दिए ।
भवनका लागि स्थानीय सहयोगी संस्थाहरु स्नोल्याण्ड एकिकृत बिकास केन्द्र र किर्डाक नेपालको सहजिकरण रहेको थियो ।
हिमाली जिल्लामा हिउँदे बिदा हुने भएको कारण नयाँ शैक्षिक सत्रबाट मात्र नयाँ निर्माण भएको भवन सञ्चालनमा आउने छ ।
विद्यालयलार्य कक्षाकोठाको अभाव रहदै आएको सो समस्या नयाँले समधान गर्ने विद्यालयले जनाएको छ । विद्यालयमा करिव तीन सय विद्यार्थी अध्ययनरत रहेका छन् ।