रोल्पा सदरमुकामस्थित बालकल्याण नमूना माध्यमिक विद्यालयमा गठित बाल क्लवका पदाधिकारीहरुले रोल्पा नगरपालिकाका नगर प्रमुख पूर्ण केसी समक्ष माग पत्र पेश गरेका छन् ।

विद्यालय आवत–जावत गर्ने बाटो जोखिमयुक्त रहेकाले उक्त बाटो मर्मत सम्भार गरिदिनु पर्ने उनहरुको मुख्य माग रहेको छ । यसका साथै विद्यालय नजिकका क्षेत्रमा पालिएका बंगुरले प्रदुषण फैलाउदा विद्यार्थीको स्वास्थ्यमा नकरात्मक असर गरिरहेको, सडक बत्ती नहुँदा बिहानी कक्षाका लागि पठनपाठन गर्ने विद्यार्थी र शिक्षकलाई समस्या हुदै आएको जस्ता समस्या समेत सो माग पत्रमा समावेश गरिएको नमुना बालक्लवका अध्यक्ष पुष्पराज शर्माले जानकारी दिए ।

विद्यार्थीहरुको माग पत्र बुझ्दै नगर प्रमुख केसीले मागप्रति आफु सकारात्मक रहेको बताएका थिए । विद्यालय रहेको वडा कार्यालय सँग समन्वय गरी विद्यार्थीको माग यसै आर्थिक वर्षमा पुरा गर्ने नगर प्रमुखले प्रतिबद्धता जनाएका थिए ।

आफ्नो समस्या आफै लिएर आएकोमा विद्यार्थीलाई नगर प्रमुख केसीले धन्यवाद दिएका थिए । आफ्नो मुद्दा आफै पहिचान गरि संवन्धित निकायमा घचघच्याउन आउनु क्लवको प्रशंसनीय कार्य हो नगर प्रमुख केसीले भने । विद्यार्थीको पठन–पाठनलाई असहज बनाईरहेका यी समस्यालाई अविलम्व हल गर्ने तर्फ लाग्ने नगर प्रमुखको भनाई थियो ।

बाल क्लवले पहिचान गरेका यी समस्या हल गर्ने विद्यालयमा आवश्यक श्रोतको अभाव रहेकाले स्थानीय सरकार समक्ष माग पत्र लिएर गएका हौं– बाल क्लवका सचिव संगीत विसीले भनिन् । बाल क्लव गठन गरे संगै आफुहरुकै अगुवाईमा विद्यालयलाई जंक फुड निषेधित क्षेत्र घोषणा गरेका छौं ।

विद्यालय हाता नजिक चुरोट खैनी, मादक पदार्थ र जंक फुडको विक्री बितरण भईरहेकाले त्यसको निषेधका लागी उनीहरुलाई ध्यानाकर्षण गराई रहेको सचिव विसीको भनाई छ ।