१ माघसत्ताधारी नेकपाका एकजना अध्यक्ष तथा पूर्वप्रधानमन्त्री प्रचण्डले विगतमा उनको नेतृत्वमा माओवादीले गरेको सशस्त्र द्वन्द्वताका मारिएकामध्ये पाँच हजारको मात्र जिम्मा आफूले लिने बताएका छन्। बाँकी १२ हजारको जिम्मा तत्कालीन राजा र राज्यपक्षले लिनुपर्ने उनले बताए।
साथै उनले साढे चार वर्षअघि कैलालीमा भएको टिकापुर हत्याकाण्डमा दोषी ठहर रेशम चौधरीलाई छुटाइने घोषणा गरेका छन्।
‘अन्याय भयो‘
काठमाण्डूको टुँडिखेल बुधवार थारु समुदायको माघी महोत्सवलाई सम्बोधन गर्दै पूर्वप्रधानमन्त्री प्रचण्डले द्वन्द्वकालमा भएका घटनाको सोलोडोलो जिम्मा आफ्नो काँधमा हालिदिने प्रवृत्तितर्फ सङ्केत गर्दै त्यो गलत भएको बताए।दश वर्ष चलेको द्वन्द्वका बेला मारिएका १७ हजार मानिसबारे उनको जिम्मेवारीबारे वक्ताले प्रश्न उठाएपछि प्रचण्डले जवाफमा त्यसो भनेका थिए।
प्रचण्डको भनाइ थियो: “मैले १७ हजार मानिस मारेर आएको भन्ने तथ्याङ्क भनिन्छ। यो सत्य होइन। सत्य के हो भने हिजोको राज्यले १२ हजार मारेको हो। तर पाँच हजारको जिम्मा मलाई दिनुहुन्छ भने म जिम्मा लिन्छु। राज्यले मारेका पनि मेरै टाउकोमा हालियो भने यो न्याय हुँदैन।” द्वन्द्वको राम्रा र नराम्रा कामको जिम्मा लिन तयार भए पनि नगरेको कामको जिम्मा नलिने उनले बताएका छन्।
उक्त महोत्सवलाई सम्बोधन गर्दै उनले झन्डै साढे चार वर्षअघि पश्चिम नेपालको कैलालीमा भएको टीकापुर हत्याकाण्डमा जिल्ला अदालतबाट दोषी ठहर गरिएका रेशम चौधरीलाई छुटाइने बचन दिएका छन्।
आफूले चौधरीलाई प्रधानमन्त्रीकै हैसियतमा भारतमा भेटेको र पछि पनि डिल्लीबजार जेलमा भेट्न गएको प्रसङ्ग पनि उठाए।
‘रेशम चौधरीलाई पनि छुटाइन्छ’
टीकापुरमा नौ जनाको हत्या भएको घटनामा सांसद चुनिएका रेशम चौधरीसहित ११ जनालाई दोषी ठहर गर्दै कैलाली जिल्ला अदालतले जन्मकैदको फैसला गरेको थियो।
“पहिलोपटक प्रधानमन्त्रीका हैसियतले आफू दोस्रोपटक प्रधानमन्त्री हुँदा रेशम चौधरीलाई भारतको राजधानी दिल्लीमा भेटेर तपाईँको कुरा के के हो राख्नुहोस् भन्ने व्यक्ति मै हुँ। सभामुख र सरकारलाई अनि पार्टीलाई भनेर कम्तीमा पनि रेशमलाई शपथ ग्रहण गराउनुपर्छ र उसलाई माननीयको दर्जा दिनुपर्छ भनेर निर्णय गराउन मुख्य भूमिका खेल्ने मानिस मै हुँ भन्ने कुरा पनि तपाईँहरू नबिर्सिनुहोला,” उनले भने।
“केही साथीहरू छुटेका छन्। रेशमलगायतका साथीहरू छुट्न बाँकी छ। केही समयभित्र छुटाइन्छ। यसको परिणाम निस्कन्छ हेर्नुहोला।”
थरूहटको आन्दोलन चर्किँदा विक्रम सम्बत् २०७२ सालको भदौ महिनामा भएको विरोधप्रदर्शन हिंसात्मक बनेपछि भिडले आक्रमण गरेर नेपाल प्रहरीका वरिष्ठ प्रहरी उपरीक्षक लक्ष्मण न्यौपानेसहित आठ सुरक्षाकर्मीलाई मारिदिएको थियो।
सो घटनामा एक बालकको पनि ज्यान गएको थियो। घटनापछि फरार रहेका रेशम चौधरी विसं २०७४ मंसिरमा भएको निर्वाचनमा राष्ट्रिय जनता पार्टीबाट उम्मेदवार भएर कैलालीबाट सांसद निर्वाचित भएका थिए।
कारागारबाटै गएर उनले एक वर्षअघि सांसद पदको शपथग्रहण पनि गरेका थिए। चौधरीलाई शपथ गराउन र माननीयको दर्जा दिलाउन पनि आफ्नो भूमिका रहेको दाबी प्रचण्डले उक्त सम्बोधनका क्रममा गरे।
हाल चौधरी निलम्बित सांसदको हैसियतमा कारागारमै छन्। उनको रिहाइका लागि लगातार राष्ट्रिय जनता पार्टीले माग गर्दै आएको छ।
विविसी नेपालीबाट
