४ माघ २०७६पोखरा । राउन्ड अन्नपूर्ण पदमार्ग अन्तर्गत ५४१६ मिटर उचाइको थोराङला पास गएका चार चिनियाँ पर्यटक सम्पर्कविहीन भएका छन् । उनीहरु गत पुस २७ मा थोराङला पास गर्नका लागि गएकोमा अहिलेसम्म थोराङला पास नगरेको र फिर्ता पनि नभएको प्रहरीले जनाएको छ । उनीहरुको खोजीमा मनाङबाट प्रहरी खटिइरहेका छन् ।
अन्नपूर्ण बेसक्याप जाने क्रममा शुक्रबार हिमपहिरोमा परेका दुई नेपाली गाइडसहित ७ जना पनि अझै भेटिएका छैनन् । अन्न्पूर्ण गाउँपालिका-११ स्थित सिगाउँबाट देउराली हुँदै अन्नपूर्ण बेसक्याम्पतर्फ जाने क्रममा देउराली भन्ने स्थानमा हिमपहिरो परेका थिए ।
आफ्ना पर्यटकको खोजी गर्न कोरियन दूताबासले बिहानैदेखि हेलिकप्टर पठाएको छ । तर उनीहरु अहिलेसम्म भेटिएका छैनन् । उद्धार र खोजीका लागि पोखराबाट गएको पदयात्रा व्यावसायीको टोलीले पनि खोजतलास सहज नभएको बताएका छन् ।
पहिरोमा परेका नेपाली गाइड जगदिश तामाङ र चिनियाँ नागरिक चाङ हाङलाई उद्दार गरी पोखरा ल्याइँदैछ ।प्रहरी उपरीक्षक दीपक रेग्मीका अनुसार हृवाङ यिविन, क्याटसियु टिङ र मा क्अिान्ली र अन्वद झाड सम्पर्कविहीन भएका हुन् ।
अन्नपूर्ण बेसक्याम्पमा भएका र त्यता जाँदै गरेका १००भन्दा बढी पर्यटकलाई विभिन्न ठाउँबाट उद्दार गरेर पोखरा ल्याइएको छ । बिहानैदेखि विभिन्न कम्पनीका हेलिकप्टरबाट अन्नपूर्ण पदयात्रामा गएका पर्यटकको उद्दार गरिएको हो ।
विभिन्न तीनवटा कम्पनीका हेलिकोप्टरले आधारशिविर क्षेत्रमा रोकिएका पर्यटक र गाइडलाई छोमरोङ झारिएको छ ।