भक्तपुर, २० माघ गृह सचिव प्रेमकुमार राईले अवकाशको दुई दिनअघि राजीनामा दिएपछि रिक्त पदमा भक्तपुरका महेश्वर न्यौपाने नियुक्त भएका छन् । सरकारले सोमबार अबेर न्यौपानेलाई नियुक्त गरेको हो ।
भक्तपुरको चाँगुनारायण नगरपालिका वडा नम्बर ३ झौखेलमा जन्मिएका न्यौपाने शाखा अधिकृतबाट निजामति सेवा प्रवेश गरेका थिए । अख्तियार दुरुपयोग अनुसन्धान आयोगमा कार्यरत न्यौपानेले यस अघि निर्वाचन आयोग र पर्यटन मन्त्रालयको सचिवको जिम्मेवारी समेत सम्हालेको अनुभव रहेको छ ।
शक्तिशाली मन्त्रालय मानिने गृह मन्त्रालय जान सचिवहरूबिच तँछाडमछाड चलिरहँदा न्यौपानेलाई प्रधानमन्त्री निवास बालुवाटारमा बसेको मन्त्रिपरिषद्को बैठकले गृह सचिव नियुक्त गर्ने निर्णय गरेको भक्तपुर पोस्ट श्रोतले दावी गरेको छ । यस्तै अख्तियारको सचिवमा भने प्रदेश १ का प्रमुख सचिव सुरेश अधिकारीलाई पठाइएको छ ।
मन्त्रिपरिषद्को औपचारिक निर्णय भने बाहिर ल्याइएको छैन ।