झापा, २४ माघझापामा गत माघ २० गते भएको बीभत्स हत्यामा संलग्नहरुलाई प्रहरीले सार्वजनिक गरेको छ । बिर्तामोड २ मा बिभत्स हत्या गरिएका ४० वर्षीय भारतीय नागरिक सुवास शेखको हत्यामा संलग्न भएको आरोपमा २ स्थानीय युवाहरुलाई प्रहरीले शुक्रवार सार्वजनिक गरेको हो ।
जिल्ला प्रहरी कार्यालय झापाका प्रमुख रहेका एसपी कृष्ण तिम्सिनाका अनुसार ४० वर्षीय शेखको हत्यामा बिर्तामोड – २ कै स्थानीय २० वर्षीय करण चौधरी र २८ वर्षीय लक्ष्मण यादवको संलग्नता भेटिएको छ । स्थानीय होटलमा मादक पदार्थ सेवन गरिरहेका उनीहरुको शेखसंग बिबाद भएपछी हत्या गरिएको बताइएको छ । शेख पनि त्यहि बसेर रक्सी खाइरहेका थिए ।
शुक्रबार पत्रकार सम्मेलन गर्दै जिप्रका झापाले हत्याको आरोपमा पक्राउ गरिएको चौधरी र यादवले हत्या स्वीकार गरेको जनाएको छ ।
”माघ २० गते साँझ एक होटलमा रक्सी सेवन गर्दा बिबाद भएपछि चौधरी र यादव दुबैजना मिलेर शेखलाई इट्टा र ढुङ्गाले हानेर घाइते बनाए त्यतिले पनि चित्त नबुझेपछि उनीहरुले शेखको लिङ्ग काटेर मारे । त्यसपछि नजिकै रहेको परालभित्र राखेर आगो सल्काइदिए ।” पत्रकार सम्मेलनमा प्रहरीले भनेको छ । उनीहरुको साथबाट गुप्ताङ्ग काट्न प्रयोग गरिएको चक्कु लगायतका सामान समेत बरामद गरिएको प्रहरीको भनाइ छ ।
मृतक शेख र अभियुक्त चौधरी तथा यादव बीच कुनै पुरानो रिसिवी नभएको र अचानक होटलमा मादक पदार्थ सेवन गर्नेक्रममा बिबाद हुँदा बिभत्स हत्याको रुप लिएको देखिएको एसपी तिम्सिनाले बताए ।