२७ माघ २०७६काठमाडौं । नेपाल प्रहरीको नयाँ महानिरीक्षक (आइजीपी) टुङ्गो लगाउन आज ,(सोमबार) बसेको मन्त्रिपरिषद बैठकले कुनै निर्णय गर्न सकेन । सोमबार बसेको मन्त्रिपरिषद बैठकले नेपाल प्रहरीको आईजीपी छनोट गर्न नसकेको हो ।
आईजीपी नियुक्तिका लागि मंगलबार फेरि मन्त्रिपरिषद बैठक बस्ने एक मन्त्रीले जानकारी दिएका छन् । मंगलबार बिहान १० बजे मन्त्रिपरिषद बैठक बोलाइएको स्रोतले जानकारी दिएको छ । सोमबार प्रधानमन्त्री निवास बालुवाटारमा बसेको मन्त्रिपरिषद बैठकमा नयाँ आईजीपी कसलाई बनाउने भन्नेबारे सामान्य छलफल भएको ती मन्त्रीले बताएका छन् ।
नयाँ आइजिपीका लागि तीन डीआईजीले दाबेदारी प्रस्तुत गरिरहेका छन् । जसमा प्रदेश–१ मा कार्यरत ठाकुर ज्ञवाली, सुदूरपश्चिम प्रदेशमा कार्यरत तारिणीप्रसाद लम्साल र प्रहरी प्रधान कार्यालयमा कार्यरत सूर्यप्रसाद उपाध्याय छन् ।
महानिरीक्षक सर्वेन्द्रनाथ खनालले मंगलबार अनिवार्य अवकाश पाएसँगै नेपाल प्रहरीको नयाँ नेतृत्व को होला भन्ने चासोको विषय बनेको छ ।