काठमाडौं, ३ फागुन नेपाल कम्युनिष्ट पार्टी (नेकपा) का केन्द्रीय सदस्य समेत रहेका भोजपुरबाट संघीय सांसद सुदन किरातीले प्रधानमन्त्रीका प्रेस सल्लाहकार माथि कटाक्ष गरेका छन् । प्रधानमन्त्री केपी शर्मा ओलीले राँची लानुपर्ने मान्छेलाई प्रेस सल्लाहकार बनाएर गल्ती भएको उनको आरोप छ ।
फागुन १ को जनयुद्ध दिवसबारे प्रेस सल्लाहकार सूर्य थापाको टिप्पणी प्रति प्रतिक्रिया जनाउदै सांसद किरातीले प्रधानमन्त्रीले राँची लानुपर्नेलाई प्रेस सल्लाहकार बनाएर गल्ती भएकोमा माफी माग्नुपर्ने समेत माग गरे । ”प्रधानमन्त्रीले माफि माग्नुपर्छ र तत्काल सूर्य थापालाई बर्खास्त गर्नुपर्छ। ” उनले भने ।
नेकपाले जनयुद्ध दिवस मनाइरहेका दिन एक टेलिभिजन अन्तर्वार्तामा प्रधानमन्त्रीका सल्लाहकार थापाले जनयुद्धको महिमा गाउन र जनयुद्ध दिवस मनाउन पार्टी एकता नगरेको अभिव्यक्ति बाट आक्रोसित सांसद किरातीले शनिबार राजधानीमा आयोजित एक अन्तर्क्रिया कार्यक्रममा प्रश्न गरे, ” के त्यसोभए प्रधानमन्त्रीको श्रीपेच पहिरिन मात्र पार्टी एकता गरेको हो ?”
अन्तर्क्रिया कार्यक्रममा किरातीले सहन शक्ति समाप्त हुनु अघि पार्टी एकता बिरोधी अभिव्यक्तिहरु बन्द हुनुपर्ने बताए । एकताको मर्म बिपरितका अभिव्यक्तिले पार्टीलाई हित नगर्ने उनको भनाइ छ ।