भक्तपुर, १ चैत स्वास्थ्य तथा जनसंख्या मन्त्रालयले स्वास्थ्यकर्मीको बिदा कटौती भएको जनाएको छ । नेपालमा कोरोना भाइरस (कोभेड १९) को संक्रमण खतरालाई मध्यनजर गर्दै मन्त्रालयले अत्यावस्यक बाहेक बिदा बस्न नपाउने बताएको हो ।
शुक्रवार सातै प्रदेशका मुख्यमन्त्री तथा मन्त्रीपरिषद्को कार्यालयलाई परिपत्र नै गरेर मन्त्रालयले स्वास्थ्यकर्मीको अत्यावश्यक बाहेक बिदा स्वीकृत नगर्न निर्देशन जारी गरेको छ । अर्को आदेश नभएसम्म स्वास्थ्य संस्थामा कार्यरत स्वास्थ्यकर्मीको बिदा स्वीकृत नगर्न परिपत्र जारी गरिएको हो। परिपत्रमा कोरोना भाइरस संक्रमण रोकथाममा सर्तकता अपनाउनुपर्ने कारण देखाउदै बिदा नदिने निर्देशन दिइएको छ ।
मन्त्रालयले प्रसूति बिदा, किरिया बिदा लाई भने रोकेको छैन । प्रसूति र किरिया बिदाबाहेक अन्य बिदा स्वीकृत नगर्न कडा निर्देशन दिइएको छ । बिदा स्वीकृत गर्नैपर्ने भए वैकल्पिक व्यक्तिको व्यवस्था गरेर मात्र स्वीकृत गर्नपर्ने परिपत्रमा प्रष्ट उल्लेख छ ।
अत्यावस्यक बाहेक स्वास्थ्यकर्मीलाई बिदा नदिने सचिव स्तरीय निर्णय बमोजिम परिपत्र गरिएको बताइएको छ ।