भक्तपुर । प्राविधिक शिक्षा तथा व्यवसायिक तालिम परिषद् (सीटीईभीटी) ले पाँच जना कृषि प्रशिक्षण सहायक माग गरेको विज्ञापनमा ९ सय ३३ जनाले आवेदन दिएका छन् ।

सीटीइभीटीले पहिलो पटक अनलाइन प्रणालीबाट आवेदन फारम दिन सकिने व्यवस्था गरेपछि यति धेरैले आवेदन दिएका हुन् । पदपूर्ति समिति सचिवालयका शाखा अधिकृत बद्रीप्रसाद दाहालका अनुसार कृषि प्रशिक्षण सहायक (प्राविधिक खरिदार) मा सबैभन्दा धेरै आवेदन परेको हो ।

प्रशासन सेवा तर्फका सहायक स्तर प्रथम श्रेणी प्रशासकीय सहायक (नायब सुब्बा) ११ पदका लागि एक हजार ७ सय २२ जनाले आवेदन दिएका छन् । खरिदार कार्यालय सहायक ६ पदको लागि ८ सय ३८ जनाको आवेदन भरेको दाहालले बताए । अधिकृतस्तर तृतीय श्रेणी प्राविधिक सिभिल इन्जिनियर १२ पदको लागि पाँच सय चार जनाले आवेदन दिएका छन् ।

अनलाइनबाट फारम भर्न मिल्ने व्यवस्था गरेपछि १ सय ३५ पदमा ७ हजार ६ सय ६५ जनाले आवेदन दिएका छन् । सीटीइभीटीले स्थायी रुपमा कर्मचारीको पदपूर्तिका लागि विज्ञापन गरेको थियो । दाहालका अनुसार जेष्ठताबाट हुने बढुवामा ५२, कार्य सम्पादन मूल्यांकनबाट हुने बढुवाका लागि २४, आन्तरिक प्रतियोगितातर्फ १४ र खुला प्रतियोगितातर्फ १३५ गरी २ सय २५ वटा पदका लागि विज्ञापन भएको थियो । खुला पदको लागि इ-सेवा र खल्ती सेवामार्फत पैसा बुझाउने व्यवस्था गरेको थियो ।