भक्तपुरपोस्ट संवाददाता भक्तपुर, १ चैत
भक्तपुर, १ चैत महानगरीय प्रहरी कार्यालय रानीपोखरीले उपत्यकाका ३ वटै जिल्लामा कार्यरत घुमुवा टोली लाई जिम्मेवारीबाट हटाएको छ । सादा पोसाकमा रही सूचनादाताको भूमिका निभाउने घुमुवा टोलीले अपेक्षाकृत काम गर्नुको साटो उल्टै बद्नाम बनेपछि जिम्मेवारीमुक्त गरिएको हो ।
उपत्यकाका भक्तपुर,ललितपुर र काठमाडौका परिसर अन्तर्गत १८ प्रहरी वृत्त र प्रभागहरुमा छ दर्जन बढी घुमुवा प्रहरी छन् । जसमा १७ जना अधिकृतस्तरका प्रहरी रहेका छन् ।
सूचनाका लागि सादा पोशाकमा खटाइए भए पनि ‘असुली’ र दलालको भूमिकामा बद्नाम बनेको गुनासो बढेपछि उनीहरूलाई जिम्मेवारी बाट हटाइएको प्रहरी श्रोतले जनाएको छ ।
”उनीहरु लामो समय सम्म कार्यरत रहेकोले फेरिएको हो । उनीहरुको ठाउँमा अब इमानदार र क्षमतावान टोली खटाइने छ ।” प्रहरी उच्च श्रोतले भन्यो ।