८ चैत, २०७६भक्तपुर । फेसबुकलाई अफवाह फ़ैलाउनेहरुले फेकबुक बनाउन प्रयोग गरिरहेको परिपेक्षमा नेपालमा पनि सो प्रयास भएको छ । नेपालका दुई अस्पताल नर्भिक र त्रिवि शिक्षण अस्पतालमा नोभल कोरोना भाइरसका बिरामी भेटिएको भ्रामक अडियो यतिबेला फेसबुक मेसेंजरमा भाइरल भएको छ ।
शनिबार बिहानैदेखि फेसबुक मेसेंजरमा अडियो मेसेज भाइरल भएपछि प्रहरीले अनुसन्धान थालेको छ । नेपाल प्रहरीका प्रवक्ता एवं डिआईजी शैलेश थापाले अडियोमा भनिएका कुरामा कुनै सत्यता नभएको र यस्तो अफवाह फैलाउने युककको खोजी भैरहेको भनेका छन् ।
कोरोना भाइरसका आशंका भए जाच्ने काम शुक्रराज ट्रपिकल अस्पतालमा मात्रै भइरहेको भएपनि उक्त अडियो शेयर हुदा मानिसहरु भ्रमित बनेका छन् । थापाथलीस्थित नर्भिक अस्पतालका अध्यक्ष बसन्त चौधरीले हुँदै नभएको खबर भाइरल भएको बताए । उनले उक्त खबर भाइरल गर्ने कार्यमा संलग्नको खोजी गरी कारवाही गर्न समेत माग गरे ।
‘ भाईरल भएको न्यूज अत्यन्तै भ्रामक हो र नियतवस गरिएको हो । नर्भिकमा यस्ता कुनै पनि बिरामीहरु नभएको जानकारी गराउन चाहन्छु । Cyber Crime Cell ले उक्त व्यक्तिको पहिचान गरी करवाई अगाडी बढाएको छ । हामी सबैलाई भ्रममा नपर्न अनुरोध गर्दछौं ।” उनले भने । महाराजगंजस्थित त्रिवि शिक्षण अस्पतालका कार्यकारी निर्देशक डा. प्रेमकृष्ण खड्काले पनि शिक्षण अस्पतालमा कोरोना आशंकामा कुनै पनि बिरामी भर्ना नै नभएको भन्दै उक्त अडियो अफवाह मात्र भएको बताए ।
