२४ चैत २०७६शिवराज नगरपालिकाले कोभिड १९ को संभावित संक्रमणको कारण उत्पन्न प्रतिकूल अवस्थाबाट प्रभावित नगरभित्रका श्रमिक तथा असहायलाई राहत वितरण कार्य शुरु गरेको छ ।
नेपाल सरकार मन्त्रीपरिषद्बाट तयार गरिएको असंगठित क्षेत्रमा कार्यरत श्रमिक वर्ग तथा असहायहरुलाई उपलब्ध गराइने राहत सम्बन्धी मापदण्ड, २०७६ बमोजिम शिवराजले पहिलो चरणको राहत वितरण कार्य शुरु गरेको हो । राहत वितरणको पहिलो दिन ३सय १५ विपन्न परिवारलाई राहत वितरण गरिएको नगर उपप्रमुख एवं राहत सामग्री खरीद तथा वितरण समिति संयोजक शिवकुमारी थारुले जानकारी दिइन् ।
वडा नं. ३ का २सय र वडा नं. ९ का १सय १५ विपन्न परिवारलाई वडामार्फत राहत वितरण गरिएको उपप्रमुख थारुले बताइन् । सर्वपक्षीय भेलाबाट सर्वसम्मत छनौटमा परेका दैनिक छाक छार्न समस्या भएका परिवारलाई राहत वितरण गरिएको थारुको भनाई छ ।
वडा नं. ३ मा समयथान मावि खरेन्द्रपुर विद्यालय प्राङ्गणबाट वितरण गरिएको वडाध्यक्ष टेकलाल सापकोटाले जानकारी दिए । सर्वपक्षीय भेलाबाट नाम आएकाले सोहाद्र्रपूर्ण वातारणमा राहत वितरण कार्य सम्पन्न भएको वडाध्यक्ष सापकोटाले बताए ।
यता वडा नं. ९मा भने स्थानीयलाई विपन्न परिवारलाई पायक पर्ने गरी विभिन्न स्थानमा लगी राहत वितरण गरिएको वडाध्यक्ष चुरबहादुर खडकाले जानकारी दिए । सर्वपक्षीय भेलाबाट अति विपन्न सूचीमा १सय १५ जनाको नाम मात्र परेकाले सोही अनुसार राहत सामग्री वितरण गरिएको वडाध्यक्ष खडकाको भनाई छ ।
यसैबीच राहत वितरणको पहिलो दिन राहत सामग्री खरीद तथा वितरण समितिले अनुगमन गरेको छ । नगरपालिकाको मापदण्ड बमोजिम नै राहत वितरण कार्य भइरहेको समितिको ठहर छ । पहिलो चरणमा शुरु गरिएको राहत सामग्रीमा चामल,े दाल, नून, तेल, साबुन लगायतका सामग्री रहेका छन् । दोस्रो दिन अर्थात चैत्र २५ गते वडा नं. ४, ६ र ११ का ४सय २५ जना विपन्नलाई राहत वितरण गरिने नगर प्रमुख नेत्रराज अधिकारीले जानकारी दिएका छन् । नगरको मापदण्ड अनुसार पहिलो चरणमा १६सय विपन्न श्रमिक तथा असहायलाई राहत वितरण गरिने नगरप्रमुख अधिकारीले बताए ।