भक्तपुर, ४ असारनोभल कोरोना भाइरस (कोभिड १९) जाेखिमका बाबजूद पेशामा क्रियाशील बागमती प्रदेशका ७ सय ५ पत्रकारको कोरोना बिमा गरिएको छ । आन्तरिक मामिला तथा कानून मन्त्रालय, बागमती प्रदेशको आर्थिक सहयोग तथा सञ्चार रजिष्ट्रार कार्यालय र नेपाल पत्रकार महासंघको समन्वयमा कोभिड १९ महामारीकाबीच अग्रपंक्तिमा रहेर काम गर्ने बागमती प्रदेशका पत्रकारको कोरोना बिमा गरिएको हो ।
कोरोना भाइरसको पिसिआर परिक्षणमा संक्रमित भएको प्रमाणित भएमा बिमा गरिएका पत्रकारले एक लाख रुपैयाको बिमा रकम युनाइटेड इन्सुरेन्स कम्पनीबाट प्राप्त गर्नेछन् । भुक्तानीका लागि कोरोना भाइरस संक्रमण देखिइ पिसिआर परिक्षणमा पोजिटिभ देखिएको हुनु पर्नेछ । यूनाइटेड इन्सुरेन्स कम्पनीका प्रतिनिधि दिनेश रेग्मीले बिहीबार बिमित पत्रकारको विवरण सञ्चार रजिष्ट्रार रेवती सापकोटालाई हस्तान्तरण गरेका छन् ।
बागमती प्रदेशमा क्रियाशिल पत्रकारको स्वास्थ्य सुरक्षा प्रति संवेदनशील भइ प्रदेश सरकारले बिमा योजना ल्याएको सञ्चार रजिष्ट्रार रेवती सापकोटाले बताए । ”पत्रकारलाई उच्च मनोबलका साथ काम गर्न बिमाले सहयोग पुग्ने बिश्वास लिएका छौ ।” उनले भने ।
आन्तरिक मामिला तथा कानून मन्त्रालयले १ हजार जना पत्रकारको बिमा गराउने निर्णय गरेको छ । बिमाका लागि आवश्यक विवरण प्राप्त भएका सात सय पाँच जनाको बिमा पहिलो चरणमा गराइएको रजिष्ट्रार सापकोटाको भनाइ छ । सञ्चार रजिष्ट्रार कार्यालयबाट परिचयपत्र प्राप्त गरेका तर अन्यत्र कोरोना बिमा नगराएकाहरुलाई बिमामा समेटिएको उनले बताए ।
बागमती प्रदेशका १३ वटै जिल्लाका क्रियाशील पत्रकार तथा ती जिल्लाबाट सञ्चालित रेडियो तथा टेलिभिजनमा कार्यरत पत्रकारलाई पनि बिमामा समेटिएको छ । नेपाल पत्रकार महासंघको बागमती प्रदेश र नेपाल पत्रकार महासंघ उपत्यका समिति अन्तर्गतका शाखा, प्रतिष्ठान र एशोसियट्सबाट प्राप्त विवरणका आधारमा पत्रकारको कोरोना बिमा गराइएको संचार रजिष्ट्रारको कार्यालयले जनाएको छ ।