प्रधानसेनापति पूर्णचन्द्र थापाले नेपाली सेनालाई तयारी अवस्थामा रहन आदेश दिएका छन् । आइतबार जंगी अड्डामा नेपाली सेनाका पृतनापतिहरुलाई निर्देशन दिंदै उनले यस्तो आदेश दिएका हुन् ।

भारतले अतिक्रमण गरेको नेपालको भूमि कालापानी, लिपुलेक र लिम्पियाधुरा प्राप्तिका लागि नेपाल सरकारले पहल गरेसंगै नेपाली सेनाको काँधमा जिम्मेवारी थपिएको भन्दै प्रधानसेनापति थापाले नेपाली भूभागलाई समेटेर सरकारले नयाँ नक्सा जारी गरिसकेको अवस्थामा सेना पनि हाइ अलर्ट अवस्थामा रहनुपर्ने बताए ।

राष्ट्र र राष्ट्रियताको लागि नेपाली सेना अविचलित रहेर कर्तव्यपथमा लम्कने भन्दै प्रधान सेनापति थापाले ‘नेपालको स्वतन्त्रता, स्वाधीनता, सार्वभौमिकता र भौगोलिक अखण्डतालाई अक्षुण राख्न नेपाली सेना सदैव प्रतिवद्ध रहने प्रष्ट पारे ।

उक्त अवसरमा प्रधानसेनापति थापाले मातहतका कमाण्डरलाई निर्देशन दिंदै राष्ट्रिय, क्षेत्रिय र अन्तर्राष्ट्रिय सुरक्षा अवस्थाको अध्ययन, विश्लेषणबाट नयाँ रणनीति र कार्य योजना निर्माण गर्न निर्देशन समेत दिएका बताइएको छ ।

भारतले नेपाली भूमि मिचेर सडक बनाएपछि कालापानी नजिकै सेनाले खडा गरेको अस्थायी क्याम्प लगायतको अवलाेकन गर्न बुधवार प्रधानसेनापति थापा त्यहाँ पुगेका थिए ।