बाहिरबाट उपत्यका छिरेकाहरूलाई घरधनीले पिसिआर रिपोर्ट मागेर परेसान पारेपछि टेकुमा दैनिक हजार बढी मानिस पिसिआर टेस्टका लागि पुग्ने गरेका छन् । लक्षण बिना नै पिसिआर टेस्ट गर्न पुगेपछि पिसिआर टेस्ट गर्दै आएको टेकुस्थित अस्पतालको काम प्रभावित बनेको छ ।

निश्चिन्तताको लागि टेस्ट गर्ने क्यापासिटी नभए पछि टेकुस्थित शुक्रराज ट्रपिकल तथा सरुवा रोग अस्पतालले गृहलाई पत्र नै लेखेर सोको जानकारी दिएपछि गृह मन्त्रालयले उपत्यकाका भक्तपुर, ललितपुर र काठमाडौं गरी ३ वटै सिडिओ कार्यालयलाई मंगलवार एक परिपत्र जारी गरेको छ ।

घरधनीले स्वाब परीक्षणमा दबाब दिएपछि समस्या भएको भन्दै गृह मन्त्रालयले प्रवेशमा रोक नलगाई डेरावाल लाई १४ दिन होम क्वारेन्टाइन बस्न दिने व्यवस्थाको लागि परिपत्र गरेको हो । होम क्वारेन्टाइनमा कुनै लक्षण देखिए मात्र पिसिआर परीक्षण गराउन गृहले आग्रह गरेको छ।

गृह मन्त्रालयले परिपत्रमा चिकित्सकलाई टेस्टका लागि दबाब नदिने व्यवस्थाका लागि आवश्यक कारवाही अघि बढाउँन निर्देशन दिएको हो ।