सत्तारुढ दल नेपाल कम्युनिष्ट पार्टी (नेकपा) काे जनवर्गिय संगठनका नेताहरुले पार्टी एकता कायम राख्न खबरदारी गरेका छन् । पार्टी केन्द्रिय कार्यालय धुम्बाराहीमा उपत्यकाका जनवर्गिय संगठनका नेताहरुले धर्ना दिँदै खबरदारी गरेका हुन् ।

युवा, विद्यार्थी, मजदुर र महिलाका नेताहरुसहित धुम्बाराही पुगेका उनीहरुले सुदृढ र मजबुत एकताका लागि खबरदारी गरेका सहभागी एक नेता दिनेश थपलियाले जानकारी दिए । थपलियाका अनुसार उनीहरुले पार्टीलाइ ज्ञापन पत्र पनि बुझाएका छन् ।

”नेताभन्दा नीति प्रधान बनाउन र पार्टीमा देखिएकाे बिबादलाइ अन्त्य गरी एकतालाइ बलियाे बनाउन खबरदारी गर्दै ज्ञापन पत्र बुझाएका हाैं ।” उनले भने ।

पछिल्लो समय प्रधानमन्त्री समेत रहेका पार्टी अध्यक्ष केपी शर्मा ओलीको पक्षका कार्यकर्ताहरु सरकारमा उनकाे नेतृत्व रहीरहनु पर्ने भन्दै सडकमा आेर्लिएपछि नेकपाकाे बिबादमात्र सतहमा आएकाे छैन, पार्टी फुटतर्फ गईरहेको देखिन्छ ।

प्रधानमन्त्री ओलीले आफूलाइ नै पार्टी ठान्ने गरेकाे र पार्टीलाई नटेर्ने गरेकाे भन्दै स्थायी समितिका ४५ मध्ये ३२ सदस्यले राजिनामा माग गरेपछि उनले चलिरहेको संसद अधिवेशनसमेत अन्त्य गरेका छन् भने पार्टीका बैठकहरुमा समेत अनुपश्थित हुन थालेका छन् ।