भक्तपुर, २५ असारनेपालबारे भ्रामक समाचार दिंदै आएका भारतीय सञ्चारमाध्यमले प्रधानमन्त्री केपी ओली र चिनियाँ राजदूत हाेउ यान्छीबारे गरेका आपत्तिजनक प्रचारको नेकपा नेतृ एवं सांसद पम्फा भुसालले आपत्ति प्रकट गरेकी छन् ।
उनले भारतीय संचारमाध्यममा नेपालका प्रधानमन्त्री र नेपालका लागी चिनियाँ राजदूतबारे गरिएको घटिया प्रचारको जती निन्दा गरे पनि कम हुने भन्दै कडा आपत्ती प्रकट गरेकी छन् । कुटनीतिक मर्यादा र सभ्यताको यो भन्दा निकृष्ट र भद्दारूप अरु हुन नसक्ने उनको ठहर छ । यसले भारतीय सभ्यता माथि नै प्रश्न खडा गरिदिएको भुसालको भनाइ छ ।
संचारमाध्यमको यति सारो दुरुपयोग र यति घटिया चिन्तनले भारतीय लोकतन्त्रको दयनियता र दरिद्रदा देखाएको उनको दावी छ । यस्तो दरिद्र चिन्तन बोकेर महाशक्ति बन्ने सपना देख्नु अघि उनीहरुलाई लज्जा बोध हुनुपर्ने पनि उनले बताइन्। पूर्व मन्त्री भुसालले उनीहरुलाई अफवाह फैलाउनु अघि सरम मान्न अर्ति समेत दिएकी छन् ।
भारतीय मिडियाको यस्तो आपत्तिजनक प्रचारलाई लिएर प्रेस काउन्सिल नेपालले पनि चासो देखाएको छ भने नेपालमा भारतीय न्युज च्यानल दूरदर्शन बाहेक सबै निजी समाचार च्यानलको प्रशारणमा रोक लगाइएकाे छ ।
