सर्लाही, १० साउनसर्लाहीको हरिपुर्वा नगरपालिका-३ धनकौलका वडाध्यक्ष माथि नगरपालिकाका प्रमुख प्रशासकीय अधिकृतले कुटपिट गरेका छन् ।
वडाअध्यक्ष धर्मराज सिंह कुशवाहा माथि गएको बिहिवार कुट्पिट भएको थियो । नगरपालिकाका प्रमुख प्रशासकीय अधिकृत सकलदेव राय सहितको समुहले वडाअध्यक्ष सिंहमाथि कुटपिट गरेको सर्लाही प्रहरीले जनाएको छ । प्रहरीका अनुसार प्रमुख प्रशासकीय अधिकृत सकलदेव राय सहित तिन जनालाई नियन्त्रणमा लिएर आवश्यक अनुसन्धान भैरहेको छ ।
कुटपिटबाट वडाध्यक्षकाे हात, छातीलगायत शरीरका विभिन्न भागमा गम्भीर चोट लागेको छ ।
उनलाई जिल्ला अस्पताल मलङ्गवामा प्राथमिक उपचार गरी थप उपचारका लागि ललितपुरको धापाखेलस्थित सुमेरु अस्पतालमा भर्ना गरिएको छ ।
उनको स्वास्थ्य अवस्थाबारे बुझ्न शनिवार श्रम, रोजगार तथा सामाजिक सुरक्षा मन्त्री रामेश्वर राय यादव अस्पताल पुगेका छन् । मन्त्री यादवले दोषीलाई कडा कार्वाही गरिने बताएका छन् । वडाध्यक्षकाे स्वास्थ्य अवस्थामा सुधार भैरहेको बताइएकाे छ ।