भक्तपुर, १७ साउन सत्तारुढ दल नेपाल कम्युनिष्ट पार्टी (नेकपा)का अध्यक्ष पुष्पकमल दाहाल प्रचण्डले पार्टीभित्रको बर्तमान बिबाद आफूहरुले पदको लागि नगरेको दाबी गरेका छन् । अहिलेको बहस पार्टी एकताकै पक्षमा र पार्टी मजबुतीको पक्षमा भएको उनको भनाइ छ ।
तुल्सीलाल अमात्यको स्मृति दिवसका अवसरमा राजधानीमा आयोजित श्रद्धाञ्जली कार्यक्रमलाई सम्बोधन गर्दै अध्यक्ष प्रचण्डले भने ‘पार्टीमा उठेको बहस पदका लागि भन्ने भ्रम पार्न खोजिएको छ, यसबारे सबै नेताकार्यकर्ता सचेत हुनु जरुरी छ ।” आफूहरुले पार्टीलाई लहडमा नभई पद्धतीमा लैजाउँ भन्ने अडान नछाड्ने र त्यसले कोही व्यक्तिलाई असर गरेपनि पार्टीलाई ठूलो फाइदा हुने उनको भनाइ छ ।
पार्टी फुटाउने प्रवृत्ती हावी भएको भन्दै उनले त्यसको मुकाबिला गरी त्यस्तो प्रवृत्तीलाई परास्त गरिने बताए ।”तर एकता कायम राख्ने नाममा गलत विचार, सस्कार र प्रवित्तिप्रति ढाकछोप गरिदैन ।”अध्यक्ष प्रचण्डले स्पष्ट पारे ।
बुर्जुवाहरू जस्तो चोचोमोचो मिलाएर कम्युनिष्ट पार्टी नचल्ने भन्दै उनले कम्युनिष्ट पार्टीमा तिखो बहस हुने र त्यसले सत्य स्थापित गर्ने उद्घोष समेत गरे ।
प्रचण्ड–माधव नेपाल समूहले प्रधानमन्त्रीसमेत रहेका अर्का अध्यक्ष केपी शर्मा ओलीको राजीनामा माग गरेपछि पछिल्लो समय सत्तारुढ नेकपाभित्रको आन्तरीक बिबाद उत्कर्षमा पुगेको छ ।