भक्तपुर, २६ साउनउपप्रधान एवं रक्षा मन्त्री इश्वर पोखरेलको नेतृत्वमा रहेको कोभिड–-१९ संकट व्यवस्थापन सेन्टर(सीसीएमसी)ले काठमाडौँ उपत्यका बाहिरको आवागमनमा पूर्ण बन्देज गर्न सरकारलाई सिफारिस गरेको छ ।
सीसीएमसीको आइतबार बसेको बैठकले २ सय भन्दा बढी सक्रिय सङ्क्रमित भएका सबै जिल्लामा जाने र त्यहाँबाट उपत्यका प्रवेश गर्नेलाई रोक्न सिफारिस गरेको हो ।
लक डाउन खुलेपछि काठमाडौं उपत्यकामा कामका लागि संक्रमित जिल्ला बाट फर्केका हरुले संक्रमण जोखिम बढाएका भन्दै उपत्यका नगरपालिका फोरमले उपप्रधान एवं रक्षा मन्त्री इश्वर पोखरेललाई आइतवार ध्यानाकर्षण गराएको थियो । फोरमका अध्यक्ष एवं महानगरका मेयर विद्यासुन्दर शाक्य र सचिव एवं मध्यपुर थिमिका मेयर मदनसुन्दर श्रेष्ठले पोखरेललाई भेटी उपत्यका मुलुकको राजधानी समेत भएको र यहाँको घनावस्ती युक्त क्षेत्रमा कोरोना संक्रम समुदायस्तरमा पुग्दा ठूलो क्षतीको खतरा रहेको अवस्था अवगत गराउदै यहाँ प्रवेश गर्ने नाकामा कडाई गर्न आग्रह गरेका थिए ।
उनीहरुको आग्रह पछि आइतवार नै सीसीएमसीको बैठक बोलाएर यी सवालहरुमा गम्भिरताका साथ छलफल गर्छौ भनेर पोखरेलले प्रतिवद्धता जनाएका कुरा मेयर शाक्यले भक्तपुर पोस्टलाई जानकारी गराएका थिए । प्रतिवद्धता अनुरुप सीसीएमसीको बैठकले २ सय भन्दा बढी सक्रिय सङ्क्रमित भएका सबै जिल्लामा जाने र त्यहाँबाट उपत्यका प्रवेश गर्नेलाई रोक्न सिफारिस गरेको हो ।
भक्तपुर पोस्ट श्रोतका अनुसार सोमबार बस्ने मन्त्रिपरिषद् बैठकले सीसीएमसीको सिफारिस बमोजिम २ सय भन्दा बढी सक्रिय सङ्क्रमित भएका जिल्लाबाट उपत्यका प्रवेशमा बन्देज लगाउने निर्णय गर्नेछ ।