८ भाद्र २०७७काठमाडौं । कोभिड –१९ संक्रमण रोकथाममा सहयोग पुर्याउँदै आएको सेभ द चिल्ड्रनले सरकारलाई सात वटा भेन्टिलेटर दिएको छ । कोभिडका विरामीहरु बढ्दै गएर भेन्टिलेटरको अभाव खेप्ने सम्भावना बढिरहेका बेला ग्लोबल फन्ड परियोजना मार्फत सेभ द चिल्ड्रनले स्वास्थ्य तथा जनसङ्ख्या मन्त्रालयलाई उपलब्ध गराईएको मेकानिकल भेन्टिलेटर एक करोड ७५ लाख ३० हजार ५ सय ३७ रुपैयाँ बराबरको रहेको छ ।
सेभ द चिल्ड्रनको तर्फबाट राजन भट्टराईले ती भेन्टिलेटर मन्त्रालयका कन्ट्री कोअर्डिनेट मेकानिजम (सीसीएम) का अध्यक्ष तथा वरिष्ठ विशेषज्ञ डा। रोशन पोखरेललाई हस्तान्तरण गरेका हुन् । सरकारलाई उपलब्ध गराइएका भेन्टिलेटरहरु महिला तथा बालबालिका र पिछडिएको समूदायको स्वास्थ्य उपचारमा प्रयोग हुनेमा विश्वस्त रहेको सेभ द चिल्ड्रनका निमित्त राष्ट्रिय निर्देशक विरेन्द्र ठगुन्नाले बताए ।
यसैबीच कोभिड–१९ संक्रमण नियन्त्रणको सहयोग स्वरुप सेभ द चिल्ड्रनले ग्लोबल फन्ड प्रोजेक्टमार्फत नै राष्ट्रिय जनस्वास्थ्य प्रयोगशलालाई पीसीआरको नमूना संकलन कार्यमा प्रयोग हुने सामग्री (पीसीआर स्याम्पल एक्स्ट्राक्सन मसिन) पनि उपलब्ध गराएको छ । यसका साथै देशभरका परीक्षण ल्याबमा २० हजार थान आरएनए जाँच र २० हजार थान पीसीआर जाँचका लागि उपकरणसमेत उपलब्ध गराएको छ ।
सेभ द चिल्ड्रनले गत बैशाखमा स्वास्थ्यमन्त्री भानुभक्त ढकालमार्फत् कोभिड–१९ संक्रमण रोकथाम तथा उपचारमा सघाउने उद्देश्यले स्वास्थ्य मन्त्रालयलाई १ हजार ७ सय ४३ सेट व्यक्तिगत सुरक्षा सामग्री (पिपिई) दिएको थियो ।
कोभिड – १९ संक्रमण रोकथाम तथा नियन्त्रणका लागि सेभ द चिल्ड्रन सम्बन्धित संघीय मन्त्रालय तथा स्थानीय तहसँगको सहकार्यमा मेडिकल तथा यसबाहेकका आपूर्ति, क्वारेन्टिन स्थलको व्यवस्थापन, प्रभावकारी सरसफाई व्यवस्थापनको प्रवद्र्धन र बालबालिका सुरक्षा प्रणाली तथा कोभिड–१९ बाट बच्ने उपायस्वरुप सूचनामूलक सन्देश प्रवाह गर्ने कार्यमा अग्रभागमा रहेर काम गर्दै आएको छ ।