ललितपुरमा शुक्रवार बिहान ४ बजेदेखि राति १० बजेसम्म कर्फ्यु लगाइएको छ । पुल्चोकमा मच्छिन्द्रनाथको रथ तान्न पुगेका मानिसहरु र प्रहरीबीच झडप भएपछि स्थिति भड्किन नदिन जिल्लाकाे चक्रपथभित्र कर्फ्यु लगाइएको हो ।

ललितपुर महानगरका मेयर चिरिबाबू महर्जन लगायतका जनप्रतिनिधि सहित बसेको जिल्ला सुरक्षा समितिको बैठकले कर्फ्यु लगाउनुपर्ने निष्कर्ष निकालेपछि सिडिओ नारायण प्रसाद भट्टले कर्फ्यु आदेश जारी गरेका छन् ।

बिहीवार निषेधाज्ञाको उल्लंघन गर्दै रातो मछिन्द्रनाथको रथ तान्ने क्रममा प्रहरीले हस्तक्षेप गरेपछि धेरै स्थानीय घाइते भएका छन् भने उनीहरुले प्रतिकार गर्दा प्रहरीहरु पनि घाइते भएका छन् । उक्त झडप ३ घण्टा सम्म चलेको थियो ।