उपत्यकाको विभिन्न स्थानका बालबालिकाहरूलाई ललाईफकाई कानको मुन्द्रा लुटपाट गर्ने एक महिला पक्राउ परेकी छन् । उनी सहित मुन्द्रा किन्ने पुरुष लाई समेत पक्राउ गर्न प्रहरी सफल भएको छ ।

काठमाण्डौंको बालाजु मनमैजु; कपन; कपुरधारा; गल्कोपाखा; स्युचाटार; कोटेश्वर; बालकुमारी; गोठाटार; पानी ट्याङ्की; महांकाल; आरुबारी; नारायणटार लगायतका ठाउँहरूबाट बिभिन्न मितिमा २२ पटक साना बालबालिकाको कानको मुन्द्रा लुटपाट गर्ने महिला र सुन किन्ने पुरुषलाई प्रहरीले पक्राउ गरेको हो । उनीहरु पक्राउ परेका महानगरीय प्रहरी परिसर काठमाडौंले पुष्टि गरेको छ ।

परिसरले जनाए अनुसार बौद्ध वृत्तको प्रहरी टोलिले बालबालिकाको कानका मुन्द्रा लुट्ने महिला र उक्त मुन्द्राहरु किन्ने पुरुष लाई नियन्त्रणमा लिएर थप अनुसान्धान कार्य गरिरहेको छ ।
हालसम्म २० जना अभिभाबकहरू प्रहरी सम्पर्कमा आएको तथा केही प्रहरी सम्पर्कमा आउन बाँकी रहेको प्रहरीको भनाइ छ ।

यसैबीच प्रहरी प्रधान कार्यालयले आफ्ना बालबालिकालाई अपरिचित व्यक्तिसँग कसरी सुरक्षित हुने भनेर सिकाउन समेत सर्वसाधारणमा अपिल गरेको छ । साथै, बालबालिका माथि यस किसिमका घटना भएमा गम्भीरतापूर्वक लिन र तत्काल नजिकको प्रहरी कार्यालयमा जानकारी गराउनहुन समेत अनुरोध गरेको छ ।