रामेछाप, ९ असोज लिखु तामाकोसी गाउँपालिकाका निर्वाचित अध्यक्ष गोविन्द खडका पुर्पक्षका लागि जेल चलान भएका छन् । शुक्रवार जिल्ला अदालत रामेछापले पुर्पक्षका लागि जेल चलान गर्ने फैसला गरेपछि उनी जेल चलान भएका हुन् ।
खडकामाथि शरीर बन्धक, बलात्कार र ठगीको मुद्दा लागेको थियो । धोवी बजारको सडक निर्माण गर्न गठित उपभोक्ता समितिका अध्यक्ष दर्पण तामाङले अध्यक्ष खड्कामाथि शरीर बन्धक तथा अपहरणको उजुरी दिएसँगै गत साउन ३० गते प्रहरीले उनलाई पक्राउ गरेको थियो । त्यससँगै गाउँपालिकाकै एक स्थानीयले जग्गा ठगीको उजुरी दिएका थिए भने गाउँपालिकाकै एक युवतीले आफूलाई दस महिना अघि अध्यक्ष खड्काले जबर्जस्ती करणी गरेको उजुरी दर्ता गराएकी थिइन् ।
खडकामाथि आवस्यक अनुसन्धान पुरा गरी प्रहरीले उनलाई अदालतमा पेश गरेको थियो । भदौ २३ गते प्रहरीले जिल्ला सरकारी वकिलको कार्यालय मार्फत उनलाई अदालतमा पेश गरेको थियो । शुक्रवार उनको थुनछेक बहस सकिएसँगै रामेछापका जिल्ला न्यायाधिश स्वीकृती पराजुलीले अध्यक्ष खड्कालाइ पुर्पक्षको लागि जेल पठाउने फैसला गरेकी हुन् ।
खड्का तत्कालीन नेकपा एमालेबाट गाउँपालिकाका अध्यक्षमा निर्वाचित भएका हुन् । उनलाई नेकपाकाे प्रदेश कमिटीले एक वर्ष अघि नै पार्टीकाे रामेछाप जिल्ला कमिटी सदस्यबाट निलम्बन गरेको थियो ।