भक्तपुर, १९ कात्तिकपूर्वसभामुख एवं सांसद नेकपाका नेता कृष्णबहादुर महरालाई पत्नी शोक परेको छ । उनको जीवनसंगिनी सिता महराको असमायिक निधन भएको हो ।
उपचारको क्रममा उनको बुधवार बिहान नर्भिक हस्पिटल काठमाडौंमा निधन भएको पारिवारिक श्रोतले जनाएको छ । नर्भिक अस्पतालमा उपचारको क्रममा आज बिहान ६ः२५ बजे निधन भएको अस्पतालले पुष्टि गरेको पारिवारिक श्रोतले जनाएको हाे ।
दशैंमा पुख्र्यौंली घर रोल्पा मेबाङ गएको बेला स्वास्थ्यमा सामान्य समस्या देखिएपछि उनलाई कात्तिक १३ गते दाङस्थित गोर्खा अस्पतालमा भर्ना गरिएको थियो । निमोनिया र स्वासप्रश्वासको समस्या देखिएपछि कात्तिक १४ गते शुक्रबार हेलिकोप्टरबाट काठमाडौं ल्याइ नर्भिक हस्पिटलमा भर्ना गरिएको थियो । नर्भिक हस्पिटलमा पीसीआर टेष्ट गर्दा कोरोना पोजेटिभ देखिएको थियो ।
सीता महरा माइस्थेनिया नामक रोगबाटसमेत विगत १० वर्षदेखि पीडित थिइन् । उनको जन्म २०१८ साउन १३ गते रोल्पाको गजुल धौलेगाउँमा भएको थियो। कृष्णबहादुर महरासँग उनको विवाह २०३५ सालमा भएको थियो। उनी तत्कालिन जनयुद्धमा नेता महरा संगै होमिएकी थिइन् । उनका निर्मल, राहुल, उन्नती र प्रगति गरी २ छोरा र २ छोरी छन् ।