सुर्खेत, १३ पुस । प्रधानमन्त्रीसमेत रहेका केपी शर्मा ओली नेतृत्वको नेकपाका केन्द्रीय सदस्य एवम् पूर्वमन्त्री महेश बस्नेतले क्रान्तिको नाममा प्रचण्डले धेरै अपराध गरेको बताएका छन् । सुर्खेत पुगेका नेता बस्नेतले सोमबार उक्त कुरा बताएका हुन् ।
राष्ट्रिय युवा सङ्घ कर्णाली प्रदेशले सोमबार सुर्खेतमा आयोजना गरेको युवा भेलालाई सम्बोधन गदै उनले क्रान्तिको नाममा अपराध गर्नेलाई नछाडिने चेतावनी समेत दिएका छन् । एकीकृत रहदाँ प्रचण्डलाइ महान नेता भन्दै भक्तपुरमा बाेलाएर तरफदारी गर्ने बस्नेतले यतिबेला भने नेपालमा प्रचण्डको नेतृत्वमा विभिन्न अपराध भएको जिकिर गरेका हुन् ।
उनले प्रचण्डले झलनाथ खनाललाई राष्ट्रपति र माधवकुमार नेपाललाई अध्यक्ष पदको लोभ देखाएर फसाएको पनि बताए ।
नेकपा अाेलीका नेता बस्नेतले आफूहरुलाई कमजोर नठान्न चेतावनी दिंदै पेरिस डाँडासमेत कब्जा गर्ने उद्घोष गरे । यस अघि पेरिस डाँडास्थित कार्यालयमा आगो लगाउने अभिव्यक्ति दिएर छवी बिगारेका बस्नेतले सोमबार भने उक्त बोली सच्याउदै पेरिस डाँडास्थित कार्यालय कब्जा गर्ने बताएका हुन् ।
ओलीले अर्कै संगठन बनाइसक्दा समेत वस्नेतले नेकपा अझै नफुटेको जिकिर गरेका थिए ।