नेपाल पत्रकार महासंघको २६ औँ महाधिवेशनको अवसरमा भक्तपुर शाखा सम्मानित भएको छ । राजधानीमा भएको २६ औँ महाधिवेशनको अवसरमा बुधवार भक्तपुर शाखा सम्मानित भएको हो ।

उपराष्ट्रपति नन्दबहादुर पुनको प्रमुख आतिथ्यतामा भएको कार्यक्रममा संचार तथा सूचना प्रविधि मन्त्री पार्वत गुरुङले भक्तपुर शाखाका अध्यक्ष पुस्करराज बुढाथोकीलाई सम्मान–पत्र प्रदान गरेका हुन् ।

प्रेस तथा अभिव्यक्ति स्वतन्त्रता रक्षा, श्रमजीवी पत्रकारको हित र संस्थागत बिकासमा योगदान गरे वापत पत्रकार महासंघको भक्तपुर जिल्ला शाखालाई केन्द्रिय समितिले सम्मान गरेको हो । सम्मान पत्र हात परेपछि अध्यक्ष बुढाथोकीले यसको श्रेय आफ्नो कार्यसमिति र जिल्लाका सबै पत्रकारहरुलाई जाने बताउदै सहयोगका लागि आभार प्रकट गरेका छन् ।

उक्त अवसरमा पत्रकार रामहरि कार्की, भगवती थापा लगायत ३५ जना पत्रकारहरु कोरोना संक्रमणको बखत जाेखिम माेलेर फिल्ड रिपोर्टिंग गरेवापत विपद पत्रकारिता पुरस्कार–२०७७ बाट सम्मानित भएका थिए । नेपाल पत्रकार महासंघ र एनआरएनए अष्ट्रेलियाको सहकार्यमा उनीहरुलाई नगद रु १० हजार सहित सम्मान पत्र प्रदान गरिएको थियो ।