भक्तपुरपोस्ट संवाददाता भक्तपुर, १४ बैशाख
भक्तपुर, १४ बैशाख गण्डकी प्रदेशसभाको विशेष अधिवेशनको दोस्रो बैठक सत्तारुढ दल नेकपा(एमाले)कै केपी ओली पक्षका सांसदले अवरुद्ध गरेका छन् ।
एमाले सांसदहरूले पीसीआर परीक्षण गर्न माग गर्दै मंगलबारको बैठक अवरुद्ध गरेका हुन् ।
बैठकमा समय लिएर बोल्दै एमाले सांसद राजीव पहारीले कोरोना भाइरसको संक्रमण बढेको तर पीसीआर परीक्षणबिनै संसद् चलाइएको भन्दै बैठक अगाडि बढ्न नदिने बताए ।
तर सांसद पहारी आफैले भने चिउडोमा मास्क लगाएका थिए ।
उनले कास्की प्रशासनले पनि निषेधाज्ञा जारी गरेको र संसदमा पनि संक्रमण फैलिन सक्ने भन्दै संसद् अगाडि बढ्न नदिने बताए ।
मुख्यमन्त्री पृथ्वीसुब्बा गुरुङविरुद्ध संसदमा सोमबार पेस भएको अविश्वास प्रस्तावमाथि विशेष अधिवेशनको दोस्रो बैठकमा छलफल गर्ने कार्यसूची थियो ।तर, संसद अवरुद्ध भएसंगै सो हुन सकेन । श्रोत : गण्डकीटाइम्स