कुनै बेला गुण्डा नाइकेको रुपमा बदनामी कमाएका दिपक मनाङ्गे मन्त्री बनेका छन् । गुण्डागर्दी छोडेर राजनीतिमा आएको केहि वर्षमै मनाङ्गे मन्त्री बन्न सफल भएका हुन् ।

गण्डकी प्रदेश सभामा मनाङ्गबाट स्वतन्त्र सांसद निर्वाचित उनको वास्तविक नाम भने राजीव गुरुङ हो । मुख्यमन्त्री पृथ्वीसुब्बा गुरुङले मन्त्रिपरिषद् विस्तारसंगै उनलाई मन्त्री नियुक्त गरेका हुन् ।

उनलाई युवा तथा खेलकुदमन्त्रीको जिम्मेवारी दिइएको छ । गण्डकी प्रदेश सरकारविरुद्ध दर्ता भएको अविश्वास प्रस्तावमाथि मतदानको संघारमा उनलाई मन्त्री बनाइएको हो ।

मुख्यमन्त्रीविरुद्ध अविश्वास प्रस्तावमा हस्ताक्षर गरेका उनलाई मुख्यमन्त्री गुरुङले नै मन्त्री बनाएका छन् । नयाँ सरकार बन्ने या पुरानै रहने भन्ने गणितमा ३ सिट सङ्ख्या रहेको राष्ट्रिय जनमोर्चा निर्णायक भूमिकामा छ । जनमोर्चाले साथ छोडेपछि मुख्यमन्त्री अल्पमतमा परेका हुन् ।

अविश्वासको प्रस्तावमा मतदान गर्ने बेलामा निर्णायक रहेको राष्ट्रिय जनमोर्चाको सांसद् खिम विक्रम शाही रहस्यमय रुपमा बेपत्ता भए। सांसद् बेपत्ता पारेको भन्दै उनको पार्टीले खोज्न माग समेत गर्यो । साँझ कोरोना लागेको भन्दै उनी अस्पतालमा भेटिए। निर्णायक मत नै बेपत्ता भएपछि प्रदेशसभा बैठक स्थगित त भयो नै नयाँ बनेको प्रदेश सरकारमा उही संसदीय व्यवस्थाको पुरानो बिकृति भित्रिएको बिश्लेषकहरुले बताएका छन् ।