नेपाल पत्रकार महासंघले आफ्ना सदस्यहरुको स्वास्थ्यलाई मध्यनजर गर्दै छुट्टै ‘आइसोलेसन सेन्टर’ बनाउने निर्णय गरेको छ । केन्द्रीय कार्यालय स्थित आवास गृहलाई महासंघले ‘आइसोलेसन सेन्टर’ बनाउने निर्णय गरेको हो ।

आइसोलेसन सेन्टरमा अक्सिजन लगायत आवस्यक भौतिक सामाग्री र प्राविधिक जनशक्तिको व्यवस्था गरिने महासचिव रोशन पुरीले जनाएका छन् । ‘आइसोलेसन सेन्टर’ बनाउन कानुनी र प्राविधिक प्रक्रिया पूरा गर्नु पर्ने भएको भन्दै उनले केहिदिनमै यो सुचारु हुने जानकारी दिए । यसबाट उपत्यकाका कोभिड १९ बाट संक्रमित पत्रकारहरुलाई यस बिरुद्ध लड्न बल प्राप्त हुने उनको भनाइ छ । यस दोश्रो लहरको कोभिड १९ का कारण पत्रकारहरु पनि संक्रमित हुने क्रम बढेसंगै र सरकारले उपचारबाट हात झिकेसंगै महासंघले आफ्नो छुट्टै आइसोलेसन सेन्टर बनाउने महत्वपूर्ण निर्णय गरेको भन्दै महासंघ सदस्यहरुले नेतृत्वको प्रशंसा गरेका छन् ।

महासचिव पुरीले उपत्यका बाहिर रहेका शाखाहरुलाई समेत आफ्ना सदस्यहरुलाई कोभिडबाट बचाउने अभियानमा लाग्न सुझाव दिएका छन् ।  आफ्नो स्वास्थ्यलाई ख्याल गरेर मात्र समाचार संकलनमा लाग्नुपर्ने आवस्यकता औल्याउदै उनले समाचार सस्प्रेषणका लागि संक्रमितको प्रत्यक्ष सम्पर्कमा नजान र स्वास्थ्य जोखिम नलिन सुझाव दिएका छन् ।