भक्तपुर,२०७८ वैशाख २५जेठ ६ गते बागमती प्रदेशबाट प्रतिनिधित्व गर्ने राष्ट्रियसभा सदस्यका लागि निर्वाचन हुँदैछ । यस पदका लागि सत्तारुढ दल नेकपा (एमाले)बाट गृहमन्त्री समेत रहेका रामबहादुर थापा बादलले उम्मेदवारी दिएका छन् ।
विपक्षी दल नेपाली कांग्रेस, नेकपा (माओवादी केन्द्र) लगायतको समर्थनमा एमालेकै माधव झलनाथ पक्षबाट डा. खिमलाल देवकोटाले उम्मेदवारी दिएका छन् । राष्ट्रियसभा सदस्यका लागि नेपाल मजदुर किसान पार्टी (नेमकिपा)ले पनि उम्मेदवारी दर्ता गराएको छ ।
काभ्रेका कृष्णबहादुर तामाङलाई राष्ट्रियसभा सदस्यको उम्मेदवारका रुपमा नेमकिपाले उभ्याएको छ । तामाङ नेमकिपाका केन्द्रीय सदस्य हुन् । तामाङको प्रस्तावकमा नेमकिपाका प्रदेश सांसद सुरेन्द्रराज गोसाईँ र समर्थकमा प्रदेश सांसद सिर्जना सायँजु रहेकी छिन् ।
नेमकिपाका उम्मेदवारले आफूलाई जित र हारसँग सरोकार नरहेको प्रष्ट पारे । उम्मेदवारी दर्ता गराएसँगै तामाङले हारजित जे भए पनि आफू पार्टीको निर्देशन अनुसार चल्ने बताए । पार्टीको निर्देशन अनुसार आफूले उम्मेदवारी दिएको भन्दै देश र जनताको लागि काम गर्ने प्रतिवद्धता उनले जनाए ।
गृहमन्त्री थापाले आफ्नो जित सुनिश्चित रहेको दाबी गरेका छन् । उनले बागमती प्रदेशमा भएकोे ९ हजार ५६४ मतमध्ये पाँच हजार १३० मत एमालेको रहेको भन्दै जित सुनिश्चत रहेकोे दाबी गरेका हुन् ।
विपक्षी दलबाट उम्मेदवारी दिएका डा.देवकोटाले आफ्नो पछाडि नेकपा (माओवादी केन्द्र) र कांग्रेस मात्र होइन, सिंगो मुलक नै साथमा रहेको बताए । अहिले संविधान र व्यवस्थालाई सरकारले धेरै कमजोर बनाएको उनको आरोप छ ।