प्रधानमन्त्री केपी शर्मा ओलीको सरकार ढलेको छ । प्रतिनिधिसभामा प्रधानमन्त्री केपी शर्मा ओलीले विश्वासको मत गुमाएपछि सरकार ढलेको हो ।

प्रधानमन्त्री ओलीले प्रतिनिधि सभासमक्ष विश्वासको मत मागेपछि मतदान भएको थियो । सोमबार भएको मतदानमा उनको पक्षमा ९३ मत मात्र परेपछि उनी पदमुक्त भएका हुन् । प्रधानमन्त्री पदमुक्त भएसँगै उनको नेतृत्वमा झन्डै दुई तिहाइसहित बनेको कम्युनिष्ट पार्टीको सरकार ढलेको छ । प्रधानमन्त्री ओलीले सम्भवतः आजै राष्ट्रपतिसमक्ष राजीनामा दिनेछन् । प्रतिनिधिसभामा विश्वासको मत माग्दै उनले संसदले आदेश दिएमा आफू सरकारको नेतृत्वमा नरहने बताएका थिए ।

मतदानमा २३२ सांसद सहभागी थिए । ओलीको पक्षमा जम्मा ९३ मत मात्र खसेको छ । विपक्षमा १२४ मत परेको छ भने १५ मत तटस्थ रहेको छ । जनता समाजवादीको महन्थ ठाकुर पक्षले तटस्थ बस्ने निर्णय गरेको थियो । माधव झलनाथ पक्षका सांसद भने अनुपस्थित रहे । संसदमा २७ सांसद अनुपस्थित रहेका थिए । अनुपस्थित रहेका अधिकांश माधव झलनाथ समूहका सांसद हुन् ।

सभामुख अग्नि सापकोटाले प्रतिनिधि सभाको अर्को बैठक बैशाख ३० गते बस्ने बताएका छन ।