सर्वोच्च अदालतले चुरेको ढुंगा, गिटी बालुवा निकासी नगर्न अन्तरिम आदेश जारी गरेको छ । शुक्रवार सर्वोच्चले यस्तो आदेश जारी गरेको हो ।

सरकारले आर्थिक वर्ष २०७८–७९ को बजेट बक्तव्यको बुँदा नम्बर १९९ मा चुरेको ढुंगा, गिटी बालुवा निकासी गरी ब्यापार घाटा घटाउने बताएको थियो । सो व्यवस्था कार्यान्वयन नगर्न अन्तरिम आदेश जारी भएको हो ।शुक्रबार प्रधानन्यायाधीश चोलेन्द्र शम्शेर जबरा, न्यायाधीशहरु दीपककुमार कार्की, मीरा खड्का, हरिकृष्ण कार्की र विश्वम्भरप्रसाद श्रेष्ठको इजलासले तत्काल कार्यान्वयन नगर्न अन्तरिम आदेश दिएको छ ।

अर्थमन्त्री विष्णु पौडेलले जेठ १५ गते प्रस्तुत गरेको बजेट वक्तव्यको १९९ नम्बर बुँदामा लेखिएको छ, ‘वातावरणीय प्रभाव मूल्यांकनको आधारमा खानीजन्य ढुंगा, गिट्टी, बालुवा निकासी गरी व्यापार घाटा न्यूनीकरण गरिनेछ । निकासी गरिने खानीजन्य निर्माण सामग्रीको परिवहनका लागि उद्योगदेखि निकासी विन्दुसम्म रोप वे निर्माण गर्न आयातमा लाग्ने भन्सार महसुलमा छुट दिने व्यवस्था मिलाएको छु ।’

हाल नेपालबाट ढुंगा गिटी निकासी गर्न प्रतिबन्ध छ । तर सरकारले बजेट वक्तव्य मार्फत ढुंगा गिटी निकासी खुला गर्न लागेको भन्दै सर्वोच्च अदालतमा सातवटा रिट परेको थियो । उक्त रिटमाथि सुनुवाइ गर्दै शुक्रबार संवैधानिक इजलासले सरकारसँग ढुंगा, गिटी निकासी खुला गर्नुको कारण पनि माग गरेको छ ।

सरकारले ढुंगा, गिटी निकासी खुला गरेर चुरे दोहन गर्न लागेको भन्दै संरक्षणकर्मी र वातावरणविज्ञहरुले पनि विरोध जनाइरहेका छन् । सरकारले तराईलाई मरभूमी बनाउन लागेको भन्दै प्रदेश २ सरकारले संघीय बजेटको बिरोध गर्दै चुरे संरक्षण गर्ने प्रादेशिक बजेटमा व्यवस्था गरेको छ ।