झापास्थित बिएण्डसी अस्पतालका कार्यकारी निर्देशक दुर्गा प्रसाईले पत्रकार सम्मेलन गरेर पत्रकारहरूलाई सार्वजिक रूपमा धम्की दिएको भन्दै नेपाल पत्रकार महासंघले गम्भीर ध्यानाकर्षण भएको जनाएको छ । महासंघले शुक्रवार एक बिज्ञप्ति जारी गर्दै प्रसाई उपर कडा कारवाहीको माग गरेको हो ।

कार्यकारी निर्देशक प्रसाईले अस्पतालबारे एक सञ्चारमाध्यममा आएको समाचारको खण्डन गर्न बुधवार बोलाएको पत्रकार सम्मेलनमा पत्रकारिताको बद्नाम गर्नुका साथै पत्रकारहरूलाई सार्वजनिक रूपमा ठाडो धम्की दिएका महासंघ झापा शाखालाई उत्घृत गर्दै महासचिव रोशन पुरीले जनाएका छन् ।

कुनै पनि सञ्चारमाध्यममा संप्रेषित समाचारप्रति चित्त नबुझे या कुनै गुनासो रहे त्यस उपर कानुनी उपचार खोज्न सकिने प्रावधान र स्थापित पद्धति छ । यसलाई बेवास्ता गर्दै अस्पताल जस्तो संवेदनशील निकायका जिम्मेवार व्यक्तिबाट पत्रकारलाई सार्वजिक रूपमा ठाडो धम्की दिनु आपत्तिजनक हुनुका साथै प्रेस तथा अभिव्यक्ति स्वतन्त्रता विरोधी काम भएको महासंघको ठहर छ ।

”महासंघ पत्रकारलाई पेशाप्रति हतोत्साहित र त्रसित बनाउने गरी धम्की दिनेलाई कानुनी कारबाही गरी सुरक्षाको प्रत्याभूति दिलाउन सम्बन्धित निकायसँग माग गर्दछ ।” बिज्ञप्तिमा भनिएको छ ।